08/07/08

A Pordenon une ocasion pierdude

Come che si pues lei ancje sul sît di Radio Onde Furlane, il Consei comunâl di Pordenon al à fate buine îr di sere la delibare là che si domande di jessi gjavâts fûr de aree là che si metarà in vore la gnove leç regjonâl su la lenghe furlane. Ancje se cun cualchi oposizion in plui di chel che al someave ae vilie dal vôt, la aministrazion comunâl pordenonese vuidade di Sergio Bolzonello e à duncje fat il prin pas par no vê di meti in vore la leç regjonâl.
Daûr di cheste decision, al spieghe Bolzonello, a son massime dôs resons: prin di dut che il Comun al jere stât cjapât dentri te zone furlanofone fissade ancjemò cu la leç 15/96 cence di une delibare de Zonte o di un vôt dal Consei comunâl; e po che la gnove leç e previôt, daûr de 482/99, che lis aministrazions locâls a garantissin une schirie di servizis linguistics pai lôr citadins judicâts dai aministradôrs pordenonês une imposizion inutile (par vie che a Pordenon i citadins no fevelaressin furlan) e costose.
Par chel che nus rivuarde, i problemis principâi leâts a cheste decision a son doi. Di une bande, il fat che Pordenon, come cjâf lûc di Provincie, al dinee cussì ogni visibilitât ae lenghe fevelade inte plui part dal Friûl ocidentâl. Di chê altre che, intai fats, al à chê di lassâ fûr la lenghe furlane ancje di un servizi fondamentâl come chel des scuelis che in citât a son frecuentadis ancje di cetancj fruts e students che a rivin de aree furlanofone de Provincie. Su chescj doi ponts, lis rispuestis dadis dal sindic Bolzonello nus somein un tic debulutis.
Contrari di ce che al pense cualchidun, nô o vin simpri crodût che tal meti in vore lis leçs a coventin gradualitât e bon sens. Cun chescj doi elements, si varès podût meti in vore la gnove leç sul furlan ancje a Pordenon, cence imponi nuie a di nissun, ma ufrint pussibilitâts gnovis a cui che lis domandave. Magari cussì no, no si à sielzût cheste strade. Pecjât… une altre ocasion pierdude.

3 commenti:

Sandri ha detto...

Mi somee pardabon une storie taliane...
Fintremai che pe tutele dal furlan a rivin dome finanziaments (par dî la veretât propit pôcs) e in pratiche nissun control, alore si sta dentri; a pene che e je ancje cualchi responsabilitât e cualchi impegn, alore fûr, cence cjalâ pardabon se il furlan al è o no lenghe de citât e de provincie di Pordenon e cence pensâ al leam tra la citât e il teritori. E dut cuinçât cuntune sborfade di nazionalisim talian di frontiere, che nol fâs mai mâl.

triku ha detto...

In efiets, invezit di "une ocasion pierdude" si podeve meti di titul al post propit "une storie taliane". :-)

ILfurlanist ha detto...

... o alc di plui penç.
Te decision dal consei di pordenon a nd è alc di provinciâl, sotan e autolesionist che mi fìas dî che Pordenon e je propit in plen furlane!