ZFD 2013. Al covente cambiâ.

Si jere ai 27 di Fevrâr dal 2004 cuant che il Comitât 482 al veve inmaneât la prime iniziative pe Zornade Furlane dai Dirits. Un apontament pensât di une bande par fâ il pont su la situazion dai dirits linguistics e nazionâi dai furlans, ma ancje di chês altris comunitâts che a formin il Friûl, e di chê altre bande par ricuardâ la impuartance de mobilitazion in difese di chescj dirits (che al vûl dî ancje tignî impiât il ricuart di cui che lu à fat intai agns e intai secui stâts, a partî di chei furlans che ai 27 di Fevrâr dal 1511 a vevin fat riviel par difindi i “dirits antîcs” des lôr comunitâts). I doi aspiets ju ricjatìn ancje inte programazion speciâl che Radio Onde Furlane e met adun ancje chest an pe Zornade Furlane dai Dirits e che us invidìn a scoltâ.

Magari cussì no, di là dai ricognossiments che nus rivin des leçs di tutele (ricognossiments che simpri di plui a restin dome sul plan formâl), i nestris dirits linguistics e nazionâi a son rispietâts pôc o nuie. Il parcè di cheste afermazion al è facil di capî se si va a lei i documents di denuncie che a son stâts dât fûr dal nestri Comitât ancje intai ultins mês. Ce che forsit al è ancjemò piês al è però il fat che masse furlans a mostrin di no vê clâr che i problemis che ju scjafoin in dì di vuê a son sì i fîs di une crisi economiche e finanziarie internazionâl, ma che a rindiju ancjemò plui pençs al è stât il fat di no jessi stâts bogns di svilupâ un sisteme di autoguvier dal Friûl che nus permetès di elaborâ percors di svilup sociâl e economic diferents.
Un sisteme di guvier di chste fate però nol pues nassi dal nuie. Par svilupâsi e par cressi al à bisugne di une cussience identitarie fuarte che e vedi tant che fonde la nestre pluralitât linguistiche e nazionâl. La stesse che tantis voltis, nô furlans, o sin i prins a calcolâ di secondarie, cuant che no une font di straçariis. O sin ancjemò in timp par cambiâ. Varìno però la braùre e la capacitât par fâlu?

E l'articul 3 dal Statût di Autonomie?

Ai 31 di Zenâr a colin i 50 agns dal Statût di Autonomie de Regjon Friûl - Vignesie Julie. Al è in gracie di cheste autonomie che la nestre tiere e à podût fâ pas indenant une vore impuartants, pas che forsit in dì di vuê tancj a dan par scontâts cence domandâsi in ce condizions che o saressin se no vessin vût cheste autonomie e cence domandâsi in ce stâts che o finiressin se o vessin di pierdile.

Vuê forsit plui che in altris moments, ancje par vie de apatie di tancj di lôr, la nestre autonomie e je sot atac. Par difindile e par incressile però no bastin lis peraulis. Di une bande al covente savêle esercitâ no par garantî cualchi privileç, ma par ufrî un model di guvier che al permeti ai citadins e aes comunitâts che si aministre di vivi miôr (sul front dai dirits, dal ambient, dai servizis, dal lavôr e v.i.). Di chê altre bande al covente motivâle, ven a dî spiegâ il parcè de nestre specialitât. Une specialitât che no si fonde plui su lis resons che a podevin jessi 50 agns indaûr, ma che in dì di vuê si fonde dome suntun element: la presince, ancjemò maioritarie, di comunitâts che a fevelin intune lenghe divierse di chê dal stât.

Su chest secont pont però la Regjon in chescj agns e à fat pardabon pôc, par no dî che e je lade di chê altre bande... La prossime legjislature no podarà fâ di mancul di frontâ chest grop, almancul che no si vueli riscjâ di pierdi la nestre autonomie. Intai 50 agns dal Statût, duncje, il Comitât 482 adun cu la associazion slovene Edinost al à dât fûr un comunicât stampe, inviât ancje a ducj i conseîrs regjonâi, là che si riclame la atenzion su chest aspiet. Un aspiet che al è leât prin di dut al articul 3 dal Statût di Autonomie che, in buine sostance, al reste ancjemò dome su la cjarte. Il test integrâl dal comunicât lu cjatais intal spazi dai coments e sul nestri sît internet.

Une Resistence che e va indenant

Ai 25 di Avrîl e cole la fieste de Liberazion dal nazifassisim. Un inovâl che al ricuarde il sacrifici di tancj di lôr che a àn lotât par concuistâ la libertât e par fâ sù un mont plui just. A passe sessante agns di chei fats, cul smamîsi de lôr memorie direte, si tint a dâ par scontade la libertât che e je rivade di chê lote popolâr. La libertât, invezit, no je mai scontade e si à simpri di impegnâsi par tignîle vive.

La vitorie sul nazifassisim, dut câs, no à puartât la fin des bataiis pe libertât, pe democrazie, pai dirits. Chestis lotis a àn viodût dispès in prime linie propit chei che a vevin fat la Resistence. Chest al vâl ancje pes bataiis pai dirits linguistics, pes nazionalitâts tibiadis, pal autoguvier. Nol è un câs che, juste par fâ un esempli, un dai prins parlamentârs a sburtâ par une leç pal furlan e par chês altris lenghis minorizadis al fos Mario Lizzero “Andrea” (te foto), un dai oms di ponte de Resistence furlane.

Magari cussì no, su chest front al reste ancjemò tant ce fâ. Lis nazionalitâts e lis lenghis minorizadis, dut câs, a cognossin ben il significât de peraule Resistence, dal moment che masse dispès e je stade la uniche forme di esistence che ur è stade permetude se no volevin jessi scanceladis o vualivadis. Par chest, vuê come îr, in Friûl come inaltrò, la Resistence e va indenant.

27 di Fevrâr: Zornade Furlane dai Dirits

"Al è zaromai di un pôcs di agns che, ai 27 di Fevrâr, il Comitât 482 al celebre la Zornade Furlane dai Dirits. Chê date, di fat, e ricuarde la Joibe Grasse dal 1511 cuant che si impià il riviel popolâr plui grant inte storie dal Friûl: un episodi storic che, fûr di ciertis leturis stereotipadis che cualchidun al va dilunc a proponi, al mostre a clâr che lis comunitâts furlanis a jerin prontis a doprâ ogni mieç par difindi i lôr dirits."

Al tache cussì il messaç dât fûr dal Comitât 482 pe Zornade Furlane dai Dirits. La version integrâl dal test le cjatais intal spazi dai coments o ben sul sît dal Comitât.
Buine Zornade Furlane dai Dirits a ducj!

Doman la ZFD su Onde Furlane

Zaromai di un pôcs di agns, Radio Onde Furlane, cu la poie dal Comitât 482, e celebre la Zornade Furlane dai Dirits cuntune programazion speciâl che e à chê di stiçâ la riflession sui dirits dai furlans e su lis bataiis inviadis par difindiju. Un apontament che, ta chest 2010, si cubie cui 30 agns de emitente par puartâ ancje altris elements di novitât inte programazion. Doman, sabide ai 27 di Fevrâr, lis trasmissions dedicadis ae ZFD a tacaran tor nûf mancul un cuart di buinore (8.45) e a laran indenant par dut il dì. Intai coments o publichìn il comunicât stampe dât fûr de emitente furlane pe ocasion.

10 agns di 482: inovâl cu la bocje gherbe

Vuê a son 10 agns juscj di cuant che la leç statâl 482 e je stade dade fûr. Nus sarès plasût celebrâ chest inovâl tune clime di fieste, ma, magari cussì no, nol è masse ce jessi legris. Cun di fat, passâts 10 agns, a son ancjemò parts significativis de leç che a restin su la cjarte: al è il câs, juste par fâ l’esempli plui grant, de presince des lenghis tuteladis de 482 inte radiotelevision publiche. Dut câs, ce che cumò al preocupe ancjemò di plui, al è il tai progressîf e continuât, dal 2006 indenant, dai fonts che a varessin di permeti di meti in vore la leç. Di chê strade, chest an che al ven, i bêçs a disposizion di dutis e dodis lis lenghis minorizadis tuteladis de 482 a saran cussì pôcs che si podarà fâ pôc e nuie. Denant di chest cuadri, duncje, plui che sunâ lis cjampanis a fieste al sarès di sunâ di muart… Cundut achel, no si à nissune intenzion di rindisi. I furlans a son stâts in prime file par agns e agns par rivâ a otignî une leç pe tutele e pe valorizazion des lenghis minorizadis. Par chest no crodìn che a restaran fers e cidins a spietâ che cualchidun le copi. Nô, almancul, no lu fasarìn!

10 agns di 482: une ocasion par fevelânt

Ca di cualchi zornade a colin i 10 agns de leç statâl 482. Il test, di fat, al jere stât fat bon dal Parlament talian ai 15 di Dicembar dal 2009 e po publicât su la Gazete Uficiâl ai 20 di Dicembar. Chest inovâl al ufrìs, duncje, la ocasion par une riflession su la leç e su cemût che si le à metude (o no metude) in vore ta chescj agns. Al è ce che si fasarà doman, lunis ai 14 di Dicembar, alì de sale cunvignis de Universitât dal Friûl (in palaç Antonin) a tacâ des 9 e mieze di buinore. Par vê plui informazions su la iniziative o podês dâ un cuc achì.

Par tignî vive la flame di pre Checo Placerean

Vuê dopodimisdì, alì de sale dal Consei de Provincie di Udin, l’Istitût Ladin Furlan “Pre Checo Placerean”, un dai membris fondadôrs dal Comitât 482, al à presentât la gnove version dal sît internet de associazion, che si pues cjatâlu achì.
Il sît, rignuvît te sô muse e tai contignûts, al informe su lis ativitâts davueltis dal Istitût e al ufrìs un archivi informatic dedicât a pre Checo Placerean cun notis su la sô vite e cuntune selezion impuartante dai siei scrits (che e larà a insiorâsi cul timp).
Juste par dânt une cerce, o proponìn achì un tocut dal scrit «La realtà etnico-culturale del popolo friulano» (1977): “Il Friûl al è un popul ancjemò vîf e vivarôs, ma pressât di un tentatîf di colonizazion che al è in vore. La cussience de sô origjinalitât nazionâl e dâ segnâi di disveâsi. La democrazie - chê vere - no varès di cancelâ i piçui, ma di difindiju. Dut câs, si spere che la Europe, se no la Italie, e cjatarà il mût di judâlu a decolonizâsi, e a rivâ al nivel di colaboradôr, no di servidôr. E la disgracie dal taramot no lu coparà - cemût che cierts cjâfs lu bramin cence dîlu - compagn che lis vueris mondiâls cui 40.000 e plui muarts no son rivadis a mandâlu par aiar.” Ta chest 6 di Mai, a 33 agns dal Orcolat, o podìn propite dî che pre Checo le veve imbrocade su la capacitât di reazion dai furlans al taramot, ma bisugne ancjemò lavorâ par fâ deventâ realtât il rest de sô prevision.

3 di Avrîl : fieste pal popul furlan

Vuê, ai 3 di Avrîl, e je la Fieste de Patrie dal Friûl, une fieste volude di pre Checo Placerean intai agns '70 par ricuardâ il moment storic che il Friûl al à vût une sô indipendence. Il program des manifestazions de fieste pal 2009 lu cjatais achì. Nô o volìn celebrâ chest aniversari cun cheste citazion di un libri di pre Toni Beline: "Lis primis celebrazions dal 3 di Avrîl lis à tacadis pre Checo tai prins agns Setante. No vin mai vude grande fole, ma si leve jù a Aquilee contents come paschis a celebrâ, a ricuardâ, a ringraziâ, a domandâ. A domandâ di cjapâ in man almancul par une volte il nestri distin, di tornâ a cjerçâ tune maniere gnove e nestre la libertât vude e pierdude secui indaûr. Une libertât regalade e je simpri a riscjo. Une libertât no sudade si le piert cence inacuarzisi. Soredut al è facil confondi la libertât cu la mancjance di sclavitût. Cuant che un popul nol comande te sô tiere nol è libar, cuant che un popul nol pues studiâ te sô lenghe nol è libar, cuant che un popul no pues decidi dal so distin nol è libar, cuant che un popul sotan no si inecuarç di jessi sotan parcè che lu an incjocât o indurmidît o scanât, nol è libar..."

Sui vot di Març

Marilenghe. Mari patrie. Mari tiere. A son peraulis là che cul zontâ “mari”, in plui di incressi il sens di afiet par ce che a rapresentin, si va marcâ cun plui fuarce il lôr aspiet feminin. Dut câs, ce che si vûl fâ intindi cu lis peraulis al è dispès lontan de realtât. In chest, magari cussì no, il riclam al feminin, al sune inmò plui induvinât.

Cun di fat, pes lenghis, pe tiere e, chel istès, pes feminis, si fevele tant di rispiet e di avualiance, ma cuant che si passe ai fats la situazion e mude. E nol covente lâ in paîs lontans par viodilu. Denant di une façade fate di dirits compagns par dutis e par ducj, masse voltis si plate la discriminazion.

Par chest fevelâ di dirits al à ancjemò sens. Seino dirits linguistics e nazionâi, come che si à fat ai 27 di Fevrâr, seino dirits des feminis come che si fâs vuê ai 8 di Març. Cu la cussience, però, che i dirits a valin simpri e no dome une dì par an e che, nol baste fevelâ di lôr, mi si à ancje di metiju in vore.

27 di Fevrâr: Zornade Furlane dai Dirits

Ancje chest an il Comitât 482 al propon une riflession pe Zornade Furlane dai Dirits, che e cole ai 27 di Fevrâr. Cun di fat, ta cheste date, si ricuarde la Joibe Grasse dal 1511 cuant che si impià il plui grant riviel popolâr inte storie dal Friûl. Si trate di un episodi storic che, se cjalât cence prejudizis, al mostre ben trop che lis comunitâts furlanis i tignissin ai lôr dirits e ce che a jerin prontis a fâ par difindiju.
Tal prin coment (ma ancje sul sît dal Comitât) us proponìn la version integrâl dal comunicât che il Comitât al à dât fûr pe ocasion: une riflession che e vûl meti prin di dut in vuaite sul pericul reâl pai furlans, ma ancje par slovens e todescs dal Friûl, di fâ dai pas indaûr intal cjamp dai dirits linguistics.
La Zornade Furlane dai Dirits e ven celebrade cuntun dì interie di programazion speciâl ancje di Radio Onde Furlane, che achì si pues viodi in detai il program.
La foto e mostre un lavôr di Tonino Cragnolini, artist furlan che al riviel de Joibe Grasse dal 1511 i à dedicât diviersis des sôs oparis.

Incuintri di Glesie Furlane

Glesie Furlane e invide ducj ae messe grande intal avôt dai Sants Ermacore e Furtunât ai 13 di Lui aes 7 sore sere inte basiliche di Aquilee.

Une scuele pal popul furlan

Tai dîs passâts al è stât un an che pre Toni Beline nus à lassâts. Nus plâs di ricuardâlu cun chestis sôs peraulis :

"Si sa che la scuele intal nestri sisteme socioculturâl e je une des colonis de societât. Al è par li che a passin ducj i zovins; al è li che si zuie l'avignî di un popul. Une scuele libare e pal om e sarà la risultive par une zoventût e une umanitât libare e preparade; une scuele dumiesteade, disumane, cence principis o cun principis sbalâts e sarà la risultive par une zoventût e une umanitât sotane, disumane, distudade, muarte. I regjims totalitaris a puedin molâ sun dut, ancje su la moralitât publiche; no molaran mai la scuele. Cussì i stâts nazionalistics. Se la scuele e je la fonde dal avignî di un popul, la mancjance di scuele e je la tombe di un popul. E il popul furlan nol à vude scuele; o intint une sô scuele".

Il nestri impegn al va ancje par che finalmentri ancje il popul furlan al puedi vê une scuele che e tegni cont de sô lenghe e de sô culture e, duncje, par che al puedi vê un avignî al pâr di ducj chei altris popui. Un avignî che al sedi pardabon so, no chel che altris a àn decidût par lui.

Cordovât in Fieste

Domenie ai 6 di Avrîl Cordovât (PN) e ospite la celebrazion uficiâl de Fieste de Patrie dal Friûl.

pape Zuan Pauli II e lis minorancis

Ai 2 di Avrîl a son stâts 3 agns de muart di pape Zuan Pauli II il prin pape a saludâ i furlans in lenghe furlane intant de sô visite dal 1993. O volìn ricuardâlu cun cheste citazion dal sô messaç"se tu vuelis la pâs rispiete lis minorancis" pe zornade de pâs dal 1989.

"Il prin dirit des minorancis al è il dirit ae esistence. Si pues dineâ chest dirit in cetancj mûts, fin ai câs plui estrems di formis diretis o indiretis di gjenocidi. Il dirit ae esistence al pues jessi dineât ancje in formis plui sutilis. Al sucêt dispès che i grups minoritaris a sedin menaçâts di estinzion culturâl. In ciertis realtâts, di fat, a son legjislazions che no ricognossin il lôr dirit a doprâ la proprie lenghe. Il rispiet [pes minorancis] al à di jessi considerât, in cualchi mût, tant che la piere di paragon par une armoniose convivence sociâl e tant che il segnâl de maturitât civîl che un Paîs e lis sôs istituzion a àn cuistât. Intune societât pardabon democratiche garantî a lis minorancis la partecipazion ae vite publiche al è segnâl di un grant progrès civîl". (Zuan Pauli II)

Ancje il Com482 al è blogarin

Mandi a ducj i navigadôrs che a passin par chi.
Ancje il Comitât 482, dopo vê screât il gnûf sît Internet, si bute ancje te blogosfere. E lu fâs propit vuê ai 3 di Avrîl, date fondamentâl de storie de nestre Patrie.
Cun chest imprest o sperìn di slargjâ inmò di plui la nestre Rêt e puartâ un contribût simpri plui fuart te nestre bataie a tutele dai dirits des comunitâts linguistichis de nestre regjon.