Regjonâls 2013: candidâts e lenghis propriis, cualchi valutazion

Il document dal Comitât 482 pes elezions regjonâls dal 2013 al sburtave par un cambiament di mentalitât inte politiche regjonâl par finîle di pensâ che promovi e doprâ in maniere normâl furlan, sloven e todesc al sedi alc di imponût de leç o, piês ancjemò, une straçarie, e tacâ invezit a viodi chestis lenghis tant che une ricjece par ducj dal pont di viste de cressite culturâl, sociâl e ancje economiche. Magari cussì no, a lei lis rispuestis che nus son rivadis, si viôt benon che chest cambiament no si lu à ancjemò vût; no almancul framieç dai candidâts ae presidence de Regjon.

Doi di lôr - Bandelli (UAR) e Galluccio (M5S) - no àn nancje rispuindût e si à cussì pierdût la ocasion di capî cemût che le pensin su cheste tematiche. Dispès però il no rispuindi al è za di bessôl une rispueste. Dai doi che invezit a àn rispuindût - Serracchiani (coalizion di centri çampe) e Tondo (coalizion di centri diestre) - si pues dî che, se si fevelàs di un incuintri di boxe, e varès vinçût la Serracchiani, ma dome ai ponts. Come a dî che il lavôr di fâ al è ancjemò tant.

Un dât interessant però al rive però dai candidâts di liste là che intal campion che si ur à mandât il document, plui o mancul uns cincuante, al à rispuindût une disine e in chest câs la adesion aes nestris propuestis e je stade totâl o pôc mancul. Al è duncje impuartant centrâsi su chei par vê in Consei regjonâl - di là di cui che al vinçarà - un grup di conseîrs atents a chescj temis e pronts a impegnâsi par sburtâ chel cambiament di mentalitât che si diseve sul imprin.

Achì o cjatais dutis lis rispuestis che nus son rivadis e une riflession finâl su cheste iniziative.

La rispueste de "Patrie" ai tais de Regjon

I mieçs di comunicazion intes lenghis minorizadis de nestre regjon si ricjatin a vivi une situazion une vore critiche par vie dai tais decidûts de aministrazion regjonâl, dai ritarts inte erogazion dai finanziaments e, plui in gjenerâl, pe mancjance di une politiche linguistiche serie. Tes ultimis setemanis si à za vût ocasion di ricuardâ lis dificoltâts de radiofonie in lenghe furlane, a tacâ di Radio Onde Furlane e di Radio Spazio 103, e de cjarte stampade par sloven, cu lis vicendis dal Novi Matajur e dal Primorski Dnevnik. Problemis pençs a tocjin però ancje La Patrie dal Friûl, il mensîl in lenghe furlane nassût ancjemò intal 1947. La direzion e la redazion dal gjornâl, cemût che a spieghin achì, a àn decidût di fâ front a cheste situazion cuntune revision radicâl dal progjet grafic dal gjornâl. Par scuvierzi la gnove muse de La Patrie dal Friûl e par resonâ sul avignî dal gjornâl l'apontament al è vuê, sabide ai 23 di Fevrâr, a 5 dopodimisdì alì dal bar dal cine Visionario a Udin (vie Asquini). Di là dai sfuarçs impuartants che si cîr di svilupâ par mantignî piadis lis vôs de informazion par furlan e par sloven e je aromai sante scugne une gnove politiche linguistiche a nivel regjonâl.

Viva Onde Furlane ai 5 e 6 di Otubar

Un dai struments par promovi une lenghe al è chel di doprâle intai mieçs di comunicazion, massime se cheste lenghe si cjate intune condizion di minorizazion tant che il furlan. In Friûl la presince de lenghe intai mieçs di comunicazion e je une vore limitade.

Intal cjamp de radiofonie la ecezion principâl e je rapresentade di Radio Onde Furlane che inte sô programazion cuotidiane e ufrìs une presince dal furlan che e je tor dal 70%. Chest al vûl dî che cui che al impie la radio e al va su lis frecuencis di Onde Furlane al pues scoltâ ogni dì, par dut l'an, programs di informazion, di culture, musicâi e di intrateniment par furlan. E dut chest al va indenant di passe 30 agns.

Une presince cussì massive de lenghe furlane intai mieçs di comunicazion no à pareli. Un imprest dal gjenar al à vût e al à une funzion primarie pe promozion de nestre lenghe, e al è - cemût che tancj di lôr a àn ricognossût - un servizi public. Chel istès la aministrazion regjonâl e fâs fature a ricognossi a chest servizi un contribût economic. Baste pensâ che, pai programs radiofonics par furlan, la Regjon e à metût a disposizion pal 2012 mancul di 40 mil euros... Pecjât che, di là de scjarsetât di cheste cifre (di dividi tra lis diviersis radios che, pôc o tant, a trasmetin ancje par furlan), lis risorsis a sedin restadis là che a jerin, ven a dî in Regjon. Cun di fat, si è zaromai in Otubar ma lis domandis fatis indenant inmò in Zenâr pai programs radiotelevisîfs par furlan no àn vude ancjemò rispueste.

Al è ancje par chest che ai 5 e ai 6 di Otubar, alì de aree Festindenda di Cjasielis di Moretan, si davuelzarà une gnove edizion di Viva Onde Furlane, manifestazion di autofinanziament metude adun des associazions "Lenghis dal Drâc" e "Il Cantîr" par judâ la emitente furlane. Fâ un salt alì al vûl duncje dî contribuî a mantignî vive cheste esperience uniche.

Achì o podês cjatâ plui in detai il program des dôs seradis.

Un libri cuintri dai lûcs comuns su la lenghe furlane

Si visaiso dal decalic sui lûcs comuns su la lenghe furlane che cualchi an indaûr il Comitât 482 al veve fat zirâ? Po ben, chê iniziative e à ufiert la ispirazion par un lavôr che al va a frontâ (e a sdrumâ) propit chei a altris lûcs comuns su la lenghe furlane e su altris lenghis che a patissin la stesse condizion di minorizazion.

O fevelìn dal libri "Cjalant il Friûl / Sguardi sul Friuli" curât di Priscilla De Agostini e Silvana Schiavi Fachin e publicât de cjase editore Forum là che cuindis personis che par storie personâl o professionâl a son leadis al Friûl (di Tullio De Mauro a Leonardo Zannier, di Xavier Lamuela a Sergio Salvi, di Pierluigi Cappello a Domenico Lenarduzzi) a resonin su chescj temis e a sdrumin jù cetancj dai lûcs comuns che inmò a zirin su la nestre lenghe e su lis azions di politiche linguistiche metudis in at par promovile.

Un lavôr, duncje, che al merete let e che al pues jessi un moment impuartant di riflession pal Friûl e no dome. La presentazion dal libri e je in program chest vinars, prin di Lui, a siet sot sere (19.00) inte cort di Palaç Morpurgo (se al plûf in sale Ajace).

Intant de presentazion si varà un confront sui temis frontâts dal libri. Moderâts di Pauli Cantarut, a intervignaran Furio Honsell, Lorenzo Fabbro, Valter Colle, Carli Pup e lis dôs curadoris. La presentazion e sarà compagnade ancje tescj lets di Andrea Collavino e Serena Di Blasio.

Politichis pal furlan: la situazion e je grivie, lis responsabilitâts claris

Lis resons par jessi preocupâts pes politichis metudis in at pe lenghe furlane a son tantis.

La gnove leç regjonâl 29/07 e je ancjemò ferme dopo trê agns parcè che la maiorance regjonâl no à fat bon nissun regolament atuatîf. Aromai al è impussibil no interpretâ cheste situazion tant che une volontât clare di impedî che la leç e jentri in vore.

Sul front de scuele, in particolâr, il test fat bon ancjemò l’Astât passât de Comission tecniche incjariade di prontâ il document al è fer intun scansel e la aministrazion regjonâl no à ancjemò dât fûr nancje un test alternatîf. Cun di plui, i bêçs stimâts par inviâ la azion di insegnament par furlan intes scuelis si ju spiete dal guvier talian: viodût i precedents, si riscje di passâ agns prime che alc si movi. Chê maiorance di gjenitôrs che a àn domandât pai lôr fîs la lenghe furlane a scuele e restarà cussì malapaiade par cui sa trop.

Ancje il gnûf contrat di servizi jenfri la Rai e il guvier talian al va cuintri de leç statâl 482. Ancje il pas indenant che si veve rivât a fâ si è scuintrât cul probleme des risorsis. Il risi al è che, ancjemò une volte, e vedi di jessi la Regjon a doprâ bêçs dai siei par vê une presince minime de lenghe furlane intal servizi radiotelevisîf public.

Intant, cui che invezit la lenghe furlane le dopre di agnorums te sô programazion, ven a dî lis radiotelevisions privadis si ricjatin pal secont an di file cu la aministrazion regjonâl che i azere i fonts pes convenzions sui programs par furlan.

La Comission paritetiche, che e veve di viodi di inviâ un percors di trasferiment des competencis dal Stât ae Regjon sul teme des minorancis e de istruzion, no à mot un dêt ta cheste direzion.

E, tant par finî, il gnûf statût de ARLeF – che al varès di jessi al esam de Zonte regjonâl – al previôt di trasferî il podê di indreçament des politichis linguistichis dal Comitât Tecnic Sientific (organisim formât di esperts) al Consei di Aministrazion (organisim di nomine politiche direte) cul risi di incressi inmò di plui il podê discrezionâl dai politics inte programazion e intal finanziament dai progjets pal furlan.

Chest, in struc, ce che a àn spiegât te conference stampe di vuê dopodimisdì i rapresentants dal Comitât 482 e dal Comitât pe Autonomie e pal Rilanç dal Friûl. Se no si mude direzion si riscje di pierdi ancje chel pôc che si à concuistât ta chescj agns: un dam pe nestre lenghe, ma ancje par ducj i furlans e pe specialitât e pe autonomie de Regjon. Nol è plui nissun che al puedi dî “jo no savevi”.

Zornade Furlane dai Dirits tal inovâl de Joibe Grasse dal 1511

Ancje chest an, ai 27 di Fevrâr, al torne l'apontament cu la Zornade Furlane dai Dirits, la iniziative inviade dal Comitât 482 ancjemò uns vot agns indaûr. La Zornade di chest an, dut câs, e cjape inmò plui significât dal moment che e ven a colâ intal inovâl dai 500 agns juscj dal riviel popolâr de Joibe Grasse.

Come par solit, in ocasion di chest apontament, il Comitât 482 al da fûr un comunicât che o podês lei par intîr intal spazi dal coments. E je deventade aromai tradizionâl ancje la programazion speciâl che Radio Onde Furlane e met adun pe ZFD e che il so program si pues lei sul sît internet de emitente radiofoniche furlane. Chest an par altri, cheste iniziative e cjape un significât inmò plui rivendicatîf viodude la situazion di dificoltât che e cjape dentri Onde Furlane par vie dal azerament dai fonts pai programs radiotelevisîfs in lenghe furlane decidût de aministrazion regjonâl pal secont an di file.

Leadis ai 500 agns dal riviel a son po cetantis iniziativis ator pal Friûl, cualchidune le cjatais sul sît de Associazion 1511 che si è dade adun propit par fâ cognossi miôr ai furlans chest toc de lôr storie.

Alcìn la bandiere dal Friûl par rivendicâ i nestris dirits, e buine Zornade Furlane dai Dirits a dutis e a ducj!

27 di Fevrâr: Zornade Furlane dai Dirits

"Al è zaromai di un pôcs di agns che, ai 27 di Fevrâr, il Comitât 482 al celebre la Zornade Furlane dai Dirits. Chê date, di fat, e ricuarde la Joibe Grasse dal 1511 cuant che si impià il riviel popolâr plui grant inte storie dal Friûl: un episodi storic che, fûr di ciertis leturis stereotipadis che cualchidun al va dilunc a proponi, al mostre a clâr che lis comunitâts furlanis a jerin prontis a doprâ ogni mieç par difindi i lôr dirits."

Al tache cussì il messaç dât fûr dal Comitât 482 pe Zornade Furlane dai Dirits. La version integrâl dal test le cjatais intal spazi dai coments o ben sul sît dal Comitât.
Buine Zornade Furlane dai Dirits a ducj!

Doman la ZFD su Onde Furlane

Zaromai di un pôcs di agns, Radio Onde Furlane, cu la poie dal Comitât 482, e celebre la Zornade Furlane dai Dirits cuntune programazion speciâl che e à chê di stiçâ la riflession sui dirits dai furlans e su lis bataiis inviadis par difindiju. Un apontament che, ta chest 2010, si cubie cui 30 agns de emitente par puartâ ancje altris elements di novitât inte programazion. Doman, sabide ai 27 di Fevrâr, lis trasmissions dedicadis ae ZFD a tacaran tor nûf mancul un cuart di buinore (8.45) e a laran indenant par dut il dì. Intai coments o publichìn il comunicât stampe dât fûr de emitente furlane pe ocasion.

Furlan e RAI: cualis prospetivis?

Cualis sono lis azions che si puedin meti in vore par sburtâ la presince de lenghe furlane intal servizi radiotelevisîf public? Al è stât chest l'argoment frontât vuê di buinore a Udin intune riunion clamade adun dal assessôr regjonâl Roberto Molinaro cu la partecipazion dai rapresentants de Provincie e dal Comun di Udin, de Curie udinese, de Universitât dal Friûl, dal Comitât pe autonomie e pal rilanç dal Friûl e dal Comitât 482.

La cuestion plui grivie e je chê dal contrat di servizi RAI – Ministeri des comunicazions là che si riscje che, ancjemò une volte, no sedin cjapadis sù lis indicazions previodudis de leç 482 pe presince des lenghis minoritariis intal servizi radiotelevisîf public. Su chest front al è l’impegn di ducj i sogjets furlans par sburtâ su la Comission parlamentâr di vigjilance RAI e sul Ministeri par che il prossim contrat al rispieti lis indicazions de 482.

Dut câs a son ancje altris fronts là che si pues intervignî. Un front al è chel de modifiche de convenzion tra la RAI e la presidence dal Consei dai Ministris pes trasmissions televisivis in Friûl – Vignesie Julie, là che la Regjon e à za domandât che une part de programazion e vegni fate par furlan. La Regjon e à po fat domande formâl par che si slargji a dut il teritori regjonâl il segnâl de rêt 3 bis in spiete che al rivi il digjitâl vie tiere (metât dal 2010). La gnove Rai 3 bis e e varès cussì di dâi acet a dutis lis lenghis de nestre regjon. La Regjon e à po confermât che la convenzion cu la RAI dal Friûl – Vignesie Julie e sarà rignuvide ancje intal 2010 pes trasmissions radiofonichis par furlan.

Incuintri public dal Comitât 482 cui candidâts aes elezions europeanis

Par sensibilizâ il mont politic regjonâl su la situazion dai dirits linguistics in Friûl - V. J., sabide ai 30 di Mai aes 11.30 inte sale Pasolini dal palaç gnûf de Regjon (Udin) il Comitât 482 al fasarà un incuintri public cui candidâts dal Friûl-V.J. aes elezions pal Parlament european. Dopo di cheste iniziative a son in program altris incuintris cui politics regjonâi e i parlamentârs elets in Friûl-V.J.

Doman il Comitât 482 su Onde Furlane

La conference stampe di vuê e sarà trasmetude doman martars ai 26 di Mai su Radio Onde Furlane aes 8.30 e aes 12.30. Il file audio de conference stampe al sarà ancje publicât in curt sul sît dal Comitât 482.

Conference stampe dal Comitât 482

Lunis ai 25 di Mai a Udin e sarà la conference stampe di presentazion dal rapuart su la situazion dai dirits linguistics de minorance furlane prontât dal Comitât 482 che al è za stât mandât al Ministeri dal interni talian e al Comitât european che al à il compit di controlâ la metude in vore de Convenzion Cuadri pe Protezion des Minorancis Nazionâls. La conference stampe e sarà regjistrade di Radio Onde Furlane e e vignarà trasmetude cuntun speciâl di pueste.

Un esempli di promozion de lenghe

Une altre biele iniziative dai Fantats Furlans par dâ visibilitât ae lenghe furlane. Si trate de distribuzion intai locâi publics di bustis di zucar scritis par furlan. Un esempli creatîf di promozion de lenghe! Par altris detais cjalait achì.

Materiâl gnûf pai cors di furlan par adults

Sei la leç statâl 482/99 (art. 4, come 3), sei la leç regjonâl 29/07 su la lenghe furlane (art. 18, come 2) a frontin, ancje se in maniere un grum plui sclagne di chel pai fruts, la cuestion dal insegnament pai adults. Si trate di une cuestion impuartante, massime intune realtât di minorizazion linguistiche come la nestre là che la plui part des personis no je in stât di scrivi e dispès e fâs fature a lei inte sô lenghe native. Ta chescj agns, ancje in gracie de 482, i cors di furlan pai adults a son cressûts sei par numar che par cualitât. Dut câs ancje chi, come tal câs dal insegnament dai fruts, un dai problemis plui sintût al è chel de scjarsetât (e in cierts câs ancje de cualitât) dal materiâl didatic.
Par chest o segnalìn cun plasê la publicazion di “Lenghe. Cors di Furlan” di Stefania Garlatti-Costa e Roberta Melchior (publicât dal Consorzi Universitari dal Friûl). Si trate di un cors di furlan par students di etât adulte pensât par podê jessi doprât di personis cun abilitâts diferentis: di chei che a capissin ben il furlan, ma no lu fevelin, a chei che lu cjacarin tant che lenghe native, ma no son bogns di leilu e scrivilu. Il test al ten cont ancje di cierts lengaçs specialistics (gjornalisim, aministrazion, medisine) e al cjape dentri: 14 unitâts progressivis, une presentazion sistematiche de grafie cun esercizis, une sezion gramaticâl cun esercizis, un glossari furlan-talian (materiâl par 60-80 oris di insegnament in classe). Il materiâl (curât te part grafiche di Francesca R. Luzzi) si svilupe suntun libri dal student, suntune vuide pal insegnant, e suntun fassicul cu lis soluzions dai esercizis.
Il cors al sarà presentât in maniere uficiâl la setemane che e ven: lunis ai 8 di Setembar a 10 di matine alì de sale cunvignis de Comunitât montane de Cjargne a Tumieç; te stesse zornade, ma a 3 tal daspomisdì, alì de sale “Soffietto” dal Ospedâl di Udin (paveon de jentrade, IV plan); miercus ai 10 di Setembar a 10 di buinore a Gurize alì de sale dal Consei provinciâl; simpri miercus a 3 tal daspomisdì alì de sale “Azzurra” de ASS de Basse furlane a Jalmic; e vinars ai 12 di Setembar a 10 di matine a Pordenon, alì de sale stampe dal palaç de Provincie.

Leterature in lenghe minorizade: l’esempli di Mantue

Si vierç vuê a Mantue la XII edizion dal Festivaletteratura, un apontament leterari tra i plui impuartants a nivel talian e che – robe che nol capite dispès in events di cheste fate – al è atent ancje ae produzion leterarie intes lenghis minorizadis. Dutis lis informazions e il program complet de manifestazion, che si siere ai 7 di Setembar, o podês cjatâlu achì.
Tra i ospits che a partegnin a minorancis nazionâls o a nazions cence stât, chest an o cjatìn autôrs tant che Bernardo Atxaga, il plui impuartant autôr basc contemporani (te foto), il sloven Boris Pahor, e il sudtirolês Joseph Zoderer. Si trate di scritôrs che a son la rispueste vive a cui che al pense che di une comunitât minoritarie al puedi rivâ dome alc di “provinciâl” e che une lenghe minorizade no sepi in stât di produsi leterature di alt nivel.
In Friûl, là che la diviersitât linguistiche e varès di jessi di cjase, i festivals e i apontaments letararis no mancjin e pûr la ande e somee plui chê di simiotâ la tindince dal moment in Italie (in chest câs pardabon in maniere provinciâl), impen di proponi alc di diferent e di origjinâl, magari propit cul invidâ scritôrs come chei che o vin ricuardât chi disore. Copiâ par copiâ, almancul cirìn di fâlu di chei brâfs… Mantue e je un bon esempli.

Lenghis minoritariis e integrazion europeane

Ta chest blog si fevele dispès di lenghis propriis e di Europe. Doi concets che plui di cualchidun, invezit, al cîr di tignî disseparâts. Cence dismenteâ che a ‘nd è fintremai di chei che a rivin a dî: “Ce pierdìno ancjemò timp cun chestis lenghis locâls, o sin in Europe!”.
Po ben, di trop che i doi concets a sedin leâts e in ce maniere, si fevele tun libri che al ven presentât propit vuê, joibe ai 19 di Jugn, a Udin. Di fat, a sîs sot sere (18.00), in sale Ajace, si presente il libri di Marco Stolfo “Lingue minoritarie e unità europea. La ‘Carta di Strasburgo’ del 1981”. La iniziative, che si insuaze tai incuintris cui autôrs inmaneâts de Biblioteche civiche Joppi di Udin, e à la poie ancje dal assessorât comunâl pe culture e dal Club Unesco di Udin.
Il test al sarà presentât, in plui dal autôr, dai professôrs Silvana Schiavi Fachin e Claudio Cressati de Universitât dal Friûl.

La liniute che e je sparide

Al è di cualchi an incà che si tint a scrivi il non de nestre regjon cence de liniute che e divît Friûl e Vignesie Julie. Une tindince che aromai e somee vê cjapât dentri un pôc ducj. Ma chê liniute ise stade pardabon gjavade vie?
Tal 2001 e je stade gjavade vie dal art. 116 de Costituzion de Republiche taliane, ma e reste inmò intal art. 131 e intes disposizions transitoriis e finâls de Cjarte costituzionâl e ancje intal Statût di autonomie de nestre Regjon. Duncje, al somee che la version plui juste dal non de nestre Regjon e resti chê cu la liniute.
Cun dut achel, te edizion de Costituzion de Republiche taliane voltade par furlan de Societât Filologjiche Furlane, la liniute e je sparide ancje ta chei articui là che te version uficiâl e sarès ancjemò, come che nus ven contât ta chest articul di Roberta Michieli publicât sul sît Lenghe.net.
Po stâi che tancj a pensin che no sedi une robe di pierdi timp daûr, ma la cuestion e je un tic plui serie. Nus ven ben spiegât tun libri jessût fûr che al è pôc e che al à non “Venezia Giulia – La regione inventata”. Il test, che al à dentri une vincjine di saçs di diviers autôrs, al è publicât de cjase editore Kappa Vu e al è curât propit di Roberta Michieli e di Giuliano Zelco.
La prossime presentazion di chest libri si le varà domenie ai 15 di Jugn a Aquilee, alì de sale dal Consei comunâl, a tacâ des 10 di matine. La iniziative, inmaneade de aministrazion comunâl aquileiese, e viodarà la partecipazion dai curadôrs e di un pôcs dai autôrs.

Blog di Storie

E dal moment che o sin daûr a fevelâ di blogs, nus pâr di just segnalâ ancje une altre biele iniziative che e je stade metude sù propit ta chescj dîs di Sandri Carrozzo. Si trate di un blog dedicât ae storie dal Friûl, a tacâ di chê plui antighe. Il blog al à non propit Storie furlane e al è fat di plante fûr in lenghe furlane.
Compliments a Sandri e augurons!

Il Sportel al torne a vierzi

La leç statâl 482/99 e previôt, tra lis altris robis, che lis aministrazions publichis dai teritoris là che si fevelin lis lenghis minoritariis tuteladis dal proviodiment a garantissin ai lôr citadins il dirit di doprâ, in forme orâl e scrite, la lôr lenghe proprie. Par vignî incuintri a chest dirit de int, la leç e previôt che i ents publics a metin sù dai sportei linguistics.
In Friûl – Vignesie Julie a son diviersis lis aministrazions che si son indotadis di un sportel linguistic, ancje se, magari cussì no, chest servizi nol è in vore pardut là che al varès di jessi. Cun di plui, par cui che al fâs il sportelist i problemis no mancjin. Il prin al è chel de precarietât. Propit chest probleme al à puartât diviers dai zovins che za si vevin cjapade sù une buine esperience a bandonâ chest lavôr par alc altri di plui sigûr.
Dut câs, a ‘nd è ancje tancj che cun snait a van indenant cun chest lavôr. Un pôcs di lôr, o forsit al sarès miôr di dî un pocjis di lôr, a àn tornât a inviâ une iniziative partide timp indaûr e po restade ferme par cualchi timp: il Sportel, ven a dî il blog dai operadôrs linguistics pe promozion de lenghe furlane.
“La idee – a spieghin dal messaç di rilanç dal blog – e je chê di meti a disposizion di ducj i operadôrs linguistics i materiâi produsûts fin cumò dai sporteliscj.” Cui che al à voie di dâur une man al pues scriviur ae direzion: sporteliscj@gmail.com
Compliments ai Sporteliscj e augurons!

Incuintris cui gnûfs aministradôrs

Ta chestis zornadis a son daûr a rivâ insom i passaçs politics e istituzionâi pe formazion des gnovis Zontis de Regjon, de Provincie e dal Comun di Udin e pal insediament dai gnûfs Conseis di chescj ents. Dilunc vie de campagne eletorâl il Comitât 482 al veve fat indenant a ducj i candidâts un document sui dirits linguistics, cumò si trate di viodi intal concret cemût che lis gnovis aministrazions si movaran ta chest cjamp. Par chest o vin za domandât un incuintri uficiâl cul president de Regjon, Renzo Tondo, e cun chel de Provincie di Udin, Pietro Fontanini. In curt o domandarìn dai incuintris ancje cul sindic di Udin, Furio Honsell, e cui assessôrs che a àn vût o a varan lis deleghis su lis lenghis propriis dal Friûl. A man a man che o varìn lis rispuestis e, massime, che si davuelzaran i incuintris o darìn cont a ducj di cemût che e je lade.