27/04/08

Une scuele pal popul furlan

Tai dîs passâts al è stât un an che pre Toni Beline nus à lassâts. Nus plâs di ricuardâlu cun chestis sôs peraulis :

"Si sa che la scuele intal nestri sisteme socioculturâl e je une des colonis de societât. Al è par li che a passin ducj i zovins; al è li che si zuie l'avignî di un popul. Une scuele libare e pal om e sarà la risultive par une zoventût e une umanitât libare e preparade; une scuele dumiesteade, disumane, cence principis o cun principis sbalâts e sarà la risultive par une zoventût e une umanitât sotane, disumane, distudade, muarte. I regjims totalitaris a puedin molâ sun dut, ancje su la moralitât publiche; no molaran mai la scuele. Cussì i stâts nazionalistics. Se la scuele e je la fonde dal avignî di un popul, la mancjance di scuele e je la tombe di un popul. E il popul furlan nol à vude scuele; o intint une sô scuele".

Il nestri impegn al va ancje par che finalmentri ancje il popul furlan al puedi vê une scuele che e tegni cont de sô lenghe e de sô culture e, duncje, par che al puedi vê un avignî al pâr di ducj chei altris popui. Un avignî che al sedi pardabon so, no chel che altris a àn decidût par lui.

2 commenti:

ILfurlanist ha detto...

Une biele maniere di ricuardâ pre Toni, brâf. Peraulis dal passât ma simpri atuâls e proietadis al futûr, parcè che la scuele e je il futûr. Il libri di cui che al è gjavât il toc al è stât rieditât chest an di Glesie Furlane. Parsore us met la cuviertute, sigûr si pues cjatâlu li di Friulibris in vie Piave a Udin, o a presit rot fasint l'abonament speciâl a «La Patrie dal Friûl».

Jaio ha detto...

Da omp, il Bieline al ere prêdi e duncje leât a un partît cun lis cjadenis. Da furlan al ere miôr e plui libar di dî la sô. No lu ai cognossût avonde par dî ce ch'al ere di plui ma s'al é par vê une scuele libare sot de glêsie al é continuâ a essi ce ch'o vin simpri stât: Sotans!