08/03/09

Sui vot di Març

Marilenghe. Mari patrie. Mari tiere. A son peraulis là che cul zontâ “mari”, in plui di incressi il sens di afiet par ce che a rapresentin, si va marcâ cun plui fuarce il lôr aspiet feminin. Dut câs, ce che si vûl fâ intindi cu lis peraulis al è dispès lontan de realtât. In chest, magari cussì no, il riclam al feminin, al sune inmò plui induvinât.

Cun di fat, pes lenghis, pe tiere e, chel istès, pes feminis, si fevele tant di rispiet e di avualiance, ma cuant che si passe ai fats la situazion e mude. E nol covente lâ in paîs lontans par viodilu. Denant di une façade fate di dirits compagns par dutis e par ducj, masse voltis si plate la discriminazion.

Par chest fevelâ di dirits al à ancjemò sens. Seino dirits linguistics e nazionâi, come che si à fat ai 27 di Fevrâr, seino dirits des feminis come che si fâs vuê ai 8 di Març. Cu la cussience, però, che i dirits a valin simpri e no dome une dì par an e che, nol baste fevelâ di lôr, mi si à ancje di metiju in vore.


1 commento:

Jaio ha detto...

Biele le foto di Tina Modotti. Chê a jere une femine ve! no veve bisugne di rivendicâ par jê stesse parce ch'a s'imponeve dome cul so jessi. Il fat di chestis fiestis al devente folcloristic. Cun dutis lis leçs in cors, lis feminis, se an voe, e san vê plui dirits che i oms. Di fat, a vivin simpri dîs agns di plui dai oms ma a van in pension prime e no ai mai vidût une femine adultere ch'a paiave une pension al so om :-)