Daûr di chê che e je deventade aromai une tradizion, ai 27 di Fevrâr il Comitât 482 al da fûr un comunicât pe Zornade furlane dai Dirits. In plui di cjatâlu sul nestri sît internet, o podês leilu ancje chi disot intal spazi dai coments.Cundut che il Comitât 482 al è impegnât prin di dut sul front dai dirits linguistics e nazionâi des comunitâts che a formin il Friûl, nol pues no cjalâ il cuadri gjenerâl de situazion che, vuê plui inmò di îr, nus domande di inviâsi su la strade de incressite dai nivei di autoguvier. Chest al è duncje il teme centrâl dal comunicât di vuê, cu la sperance che al deventi simpri di plui un element di resonament condividût.
Buine Zornade Furlane dai Dirits a dutis e a ducj!
1 commento:
27 di Fevrâr: Zornade Furlane dai Dirits
A son passâts 501 agns di cuant che – si jere ai 27 di Fevrâr dal 1511 – a Udin si à impiade la faliscje de plui grande rivolte popolâr de storie dal Friûl. Tes campagnis de nestre tiere, il riviel al è stât puartât indenant intal non dal rispiet des “leçs antighis”, o sei dai dirits di autoguvier rivendicâts des comunitâts rurâls furlanis. Par cheste reson il Comitât 482 al à decidût di sielzi cheste date par celebrâ la Zornade Furlane dai Dirits e, adun cun altris realtâts furlanis, al va dilunc a ricuardâle.
Il Comitât 482 al è nassût cun chê di difindi i dirits linguistics e nazionâi des comunitâts che a formin il Friûl. Magari cussì no, o sin inmò lontans dal rivâ a viodiju garantîts e, in cierts câs, fintremai ricognossûts. Cheste zornade, duncje, e je un ocasion par tornâ a rivendicâju cun fuarce. Cundut che intal ultin an si à viodût cualchi piçul pas indenant de bande de Regjon intal meti in vore lis leçs di tutele par furlan, sloven e todesc, la situazion no je par nuie biele. Dome par restâ intal cjamp dai dirits di fonde si pues dî che: la maiorance dai fruts no à la pussibilitât di studiâ la e inte sô lenghe proprie; inte plui part des aministrazions publichis i servizis a restin dome par talian; la radiotelevision publiche no rispiete la pluralitât linguistiche che lis leçs talianis e internazionâls i domandin.
Al è tai moments di crisi che si capìs miôr cuale che e je la direzion che si vûl cjapâ e il cuadri che o vin sot dai voi al somee avonde clâr. Di une bande si tain lis risorsis par garantî i dirits – il tai decidût dal guvier Monti pai fonts de leç su lis minorancis al è il piês mai viodût, ma il discors si pues slargjâ a cetancj altris dirits di fonde – e di chê altre si va dilunc a bati su progjets multimilionaris che a van cuintri dai interès des comunitâts locâls, motivantju cun promessis di svilup che ae prove dai fats no àn mani. Juste par restâ in Friûl, baste pensâ a chês “grandis” oparis – dal TAV ae autostrade Cimpel-Glemone, dai eletrodots aeris al dopleament de centrâl di Somplât – che no fasin dal sigûr i interès dai furlans, ma che a laran a pescjâ tes lôr sachetis e a metaran ipotechis pesantis su la lôr tiere.
Magari cussì no, e je une storie che o vin za viodût, ma no je sante scugne. Si à di savoltâ cheste logjiche di sotanance ai interès di pôcs e di centralizazion, par svicinâ plui che si pues lis decisions ae int. Intal Stât, compagn che in Regjon. Puartâ i centris decisionâi dongje dai citadins nol è dome un at di democrazie, ma al jude a evitâ straçariis. Al è par chel che la Regjon e à di fâsi dâ dal Stât plui competencis e plui risorsis (sot forme di aument des compartecipazions), a tacâ di chês su scuele e “minorancis”. Al è par chel che la Regjon e à di trasferî plui competencis e plui risorsis ai Comuns. Contrari di ce che cualchidun al volarès fâ crodi, incressi i nivei di autoguvier locâl al devente simpri di plui une necessitât se no volìn riscjâ di fâsi scjafoiâ. O vin il dirit e il dovê, come popul, di decidi dal nestri avignî. Sarìno bogns di fâlu? Sarìno in stât di fâ sù un Friûl che al puedi deventâ pardabon patrie di dirits par dutis e par ducj? E je une sfide di fâ tremâ lis venis, ma e je chê che plui di dutis e merete di jessi frontade.
Il puartevôs dal Comitât 482
Carli Pup
Posta un commento