Evitìn di dî "ca..dis"!

Ospit di une trasmission radiofoniche de RAI regjonâl, il president dal Friûl - Vignesie Julie al varès dite che par lui la leç su la lenghe furlane imbastide intant de aministrazion Illy e je une "ca..de" e che pal furlan i bêçs si podeve spindiju cuant che si veve bondance, no cumò che e je criùre. La gnove e ven segnalade e comentade intal sît internet dal setemanâl "La Vita Cattolica", cemût che si pues lei achì.

Che pal president de Regjon il furlan nol fos une prioritât si lu veve za capît. Lui stes lu veve declarât sul imprin de legjislature. Chel istès di un rapresentant des istituzions, clamadis par primis a mostrâ rispiet pes leçs e pe lôr metude in vore, e dal president di une Regjon che là sô reson di autonomie aromai e je dome la presince maioritarie di comunitâts che a fevelin une lenghe divierse di chê dal stât, si saressin spietât un compuartament diviers. Si saressin spietâts plui rispiet pai principis che o cjatìn tes convenzions europeanis (che ancje il Friûl - VJ al è clamât a rispietâ), te Costituzion de Republiche taliane, tal Statût di Autonomie e tes leçs statâls e regjonâls; plui rispiet par ducj chei furlans che i tegnin ae lôr lenghe e ae lôr identitât.

O vin simpri cirût di mantignî un nivel di rispiet pes istituzions, ancje cuant che lis vin contestadis pai lôr compuartaments, ma cui che nol à rispiet nol merete rispiet. Se o vin di fevelâ di bêçs straçâts in timps di criùre, no acetìn lezions di cui che cul so pat cun Tremonti al à obleât la nestre Regjon - ven a dî ducj i citadins dal Friûl - Vignesie Julie - a dâi al guvier talian 370 milions ad an in cambi di promessis vueidis. I 370 milions ad an che Tondo i à regalât a Rome a corispuindin ae cifre che la sô aministrazion (basantsi sui numars de finanziarie dal 2013) e spindarès pal furlan in 222 agns. Cui isal alore che al strace pardabon i bêçs? Cui isal - par doprâ lis peraulis di Tondo - chel che al fâs pardabon "ca..dis"?

ZFD 2013. Al covente cambiâ.

Si jere ai 27 di Fevrâr dal 2004 cuant che il Comitât 482 al veve inmaneât la prime iniziative pe Zornade Furlane dai Dirits. Un apontament pensât di une bande par fâ il pont su la situazion dai dirits linguistics e nazionâi dai furlans, ma ancje di chês altris comunitâts che a formin il Friûl, e di chê altre bande par ricuardâ la impuartance de mobilitazion in difese di chescj dirits (che al vûl dî ancje tignî impiât il ricuart di cui che lu à fat intai agns e intai secui stâts, a partî di chei furlans che ai 27 di Fevrâr dal 1511 a vevin fat riviel par difindi i “dirits antîcs” des lôr comunitâts). I doi aspiets ju ricjatìn ancje inte programazion speciâl che Radio Onde Furlane e met adun ancje chest an pe Zornade Furlane dai Dirits e che us invidìn a scoltâ.

Magari cussì no, di là dai ricognossiments che nus rivin des leçs di tutele (ricognossiments che simpri di plui a restin dome sul plan formâl), i nestris dirits linguistics e nazionâi a son rispietâts pôc o nuie. Il parcè di cheste afermazion al è facil di capî se si va a lei i documents di denuncie che a son stâts dât fûr dal nestri Comitât ancje intai ultins mês. Ce che forsit al è ancjemò piês al è però il fat che masse furlans a mostrin di no vê clâr che i problemis che ju scjafoin in dì di vuê a son sì i fîs di une crisi economiche e finanziarie internazionâl, ma che a rindiju ancjemò plui pençs al è stât il fat di no jessi stâts bogns di svilupâ un sisteme di autoguvier dal Friûl che nus permetès di elaborâ percors di svilup sociâl e economic diferents.
Un sisteme di guvier di chste fate però nol pues nassi dal nuie. Par svilupâsi e par cressi al à bisugne di une cussience identitarie fuarte che e vedi tant che fonde la nestre pluralitât linguistiche e nazionâl. La stesse che tantis voltis, nô furlans, o sin i prins a calcolâ di secondarie, cuant che no une font di straçariis. O sin ancjemò in timp par cambiâ. Varìno però la braùre e la capacitât par fâlu?

La rispueste de "Patrie" ai tais de Regjon

I mieçs di comunicazion intes lenghis minorizadis de nestre regjon si ricjatin a vivi une situazion une vore critiche par vie dai tais decidûts de aministrazion regjonâl, dai ritarts inte erogazion dai finanziaments e, plui in gjenerâl, pe mancjance di une politiche linguistiche serie. Tes ultimis setemanis si à za vût ocasion di ricuardâ lis dificoltâts de radiofonie in lenghe furlane, a tacâ di Radio Onde Furlane e di Radio Spazio 103, e de cjarte stampade par sloven, cu lis vicendis dal Novi Matajur e dal Primorski Dnevnik. Problemis pençs a tocjin però ancje La Patrie dal Friûl, il mensîl in lenghe furlane nassût ancjemò intal 1947. La direzion e la redazion dal gjornâl, cemût che a spieghin achì, a àn decidût di fâ front a cheste situazion cuntune revision radicâl dal progjet grafic dal gjornâl. Par scuvierzi la gnove muse de La Patrie dal Friûl e par resonâ sul avignî dal gjornâl l'apontament al è vuê, sabide ai 23 di Fevrâr, a 5 dopodimisdì alì dal bar dal cine Visionario a Udin (vie Asquini). Di là dai sfuarçs impuartants che si cîr di svilupâ par mantignî piadis lis vôs de informazion par furlan e par sloven e je aromai sante scugne une gnove politiche linguistiche a nivel regjonâl.

Titui in ros e pagjinis in blanc

Se bo glas naših dolin ugasnu?  La vôs de nestre valade si distudaraie? Chest titul in ros al vierç il numar di cheste setemane dal Novi Matajur, il setemanâl dai slovens de provincie di Udin. Magari cussì no, la domande no je un esercizi di retoriche e nancje une maniere di fâ alarmisim. Il parcè dal risi che il Novi Matajur nol jessi plui al è spiegât in maniere une vore clare intai trê articui - un par sloven standard, un inte varietât slovene des valadis e un par talian - là che la redazion e conte la situazion critiche che il gjornâl si cjate a vivi. A rindi inmò plui di impat il messaç e je po la sielte, une vore sufierte, di lassâ in blanc dutis lis pagjinis dal setemanâl fûr che la prime. Un efiet, chel che al fâs il sfueâ un gjornâl vueit, che al vâl forsit di plui di tantis peraulis.

Di dulà nassie cheste situazion. Di une bande dai tais intai finanziaments e dai ritarts inte erogazion dai fonts assegnâts (ma cui che al spiete intal framieç al à di paiâ, par esempli, i dipendents, la stamparie, lis spesis di spedizion, lis boletis e v.i.): il stes probleme che al colpìs ancje altris mieçs di informazion che a doprin une lenghe minorizade (juste al 28 di Zenâr al Comitât 482 i è stât domandât di intervignî intune conference stampe là che Radio Onde Furlane e Radio Spazio 103 a denunciavin la lôr situazion une vore grivie). Di chê altre bande si à però di zontâ ancje une inchieste de finance che di passe un an e je daûr a blocâ lis risorsis che i spietaressin al Novi Matajur daûr de leç su la stampe. Un tant, si dîs, al coventarès par sclarî i rapuarts che a son tra il setemanâl e il cuotidian Primorski Dnevnik. Une vicende che e je pardabon di no crodi: prime si invide i sogjets che a àn finalitâts similârs a colaborâ tra di lôr par ridusi i coscj e miorâ i risultâts e po, a cui che lu fâs, i si mande la finance par viodi ce che al è sot…

Par savê alc di plui si pues lei chest articul dal Novi Matajur o cjatâsi vinars ai 15 di Fevrâr, a sîs e mieze sot sere, alì dal Slovenski Kulturni Center di Sant Pieri. Vuê plui che in altris moments al è impuartant dâsi dongje e sostignîsi, furlans cun slovens, slovens cun furlans. Il Friûl nol à nissun avignî se chestis dôs comunitâts a van al mancul, se chestis lenghis si sfantin e se cui che i da vôs al siere.

E l'articul 3 dal Statût di Autonomie?

Ai 31 di Zenâr a colin i 50 agns dal Statût di Autonomie de Regjon Friûl - Vignesie Julie. Al è in gracie di cheste autonomie che la nestre tiere e à podût fâ pas indenant une vore impuartants, pas che forsit in dì di vuê tancj a dan par scontâts cence domandâsi in ce condizions che o saressin se no vessin vût cheste autonomie e cence domandâsi in ce stâts che o finiressin se o vessin di pierdile.

Vuê forsit plui che in altris moments, ancje par vie de apatie di tancj di lôr, la nestre autonomie e je sot atac. Par difindile e par incressile però no bastin lis peraulis. Di une bande al covente savêle esercitâ no par garantî cualchi privileç, ma par ufrî un model di guvier che al permeti ai citadins e aes comunitâts che si aministre di vivi miôr (sul front dai dirits, dal ambient, dai servizis, dal lavôr e v.i.). Di chê altre bande al covente motivâle, ven a dî spiegâ il parcè de nestre specialitât. Une specialitât che no si fonde plui su lis resons che a podevin jessi 50 agns indaûr, ma che in dì di vuê si fonde dome suntun element: la presince, ancjemò maioritarie, di comunitâts che a fevelin intune lenghe divierse di chê dal stât.

Su chest secont pont però la Regjon in chescj agns e à fat pardabon pôc, par no dî che e je lade di chê altre bande... La prossime legjislature no podarà fâ di mancul di frontâ chest grop, almancul che no si vueli riscjâ di pierdi la nestre autonomie. Intai 50 agns dal Statût, duncje, il Comitât 482 adun cu la associazion slovene Edinost al à dât fûr un comunicât stampe, inviât ancje a ducj i conseîrs regjonâi, là che si riclame la atenzion su chest aspiet. Un aspiet che al è leât prin di dut al articul 3 dal Statût di Autonomie che, in buine sostance, al reste ancjemò dome su la cjarte. Il test integrâl dal comunicât lu cjatais intal spazi dai coments e sul nestri sît internet.

Pe Regjon no valìn nancje il 0,1% dal belanç

Trops bêçs investissie la Regjon pe lenghe furlane? Se si va a cjalâ lis cifris de leç finanziarie regjonâl pal 2013 si fevele di sì e no il 0,02% dal belanç totâl de Regjon. Une percentuâl che e à pôc a ce viodi cu lis declarazions, ancje resintis, fatis di rapresentants de aministrazion regjonâl vuidade di Renzo Tondo su la impuartance dal furlan e di chês altris lenghis minorizadis, ancje intune prospetive di difese e di ricualificazion de specialitât e de autonomie dal Friûl – VJ. Al è chest il teme dal ultin comunicât stampe dât fûr dal Comitât 482 adun cul Comitât pe autonomie e pal rilanç dal Friûl.
Inte leç finanziarie pal 2013 pal furlan al è dome un milion e 660 mil euros, la plui part, o sei 950 mil (50 mil in mancul dal an passât), pal ûs curicolâr de lenghe inte scuele. Pai programs radiotelevisîfs par furlan no si à metût un euro, la ARLeF si è ricjatade cul belanç cuasi smiezât e, in medie, rispiet al 2012 lis risorsis pal furlan gjestidis dal assessôr Elio De Anna a son stadis taiadis dal 49,6%. In ogni câs la cifre totâl e je fintremai plui basse di chê che la Regjon e à metût pal teatri Verdi di Triest!
Pe comunitât slovene lis risorsis a son plui altis – si fevele di alc di mancul di 4 milions di euros – ma a son inte plui part fonts di divignince statâl, parcè che la Regjon, di sô, no met nancje 300 mil euros. Pes comunitâts di lenghe todescje, invezit, la finanziarie e previôt un stanziament di 150 mil euros. Al è po un milion e 300 mil euros a van ai ents locâi par intervents che a varessin di jessi leâts ae aplicazion des leçs di tutele des minorancis. Ae fin se si metin adun risorsis statâls e regjonâls, fonts pal furlan, pal sloven e par todesc, si rive a di une cifre totâl che no tocje nancje il 0,1% des risorsis che a formin la leç finanziarie.
Invistî mancul dal 0,1% dal belanç par chê che aromai e je la uniche reson che e permet di justificâ la specialitât e la autonomie dal Friûl - VJ al è un dât che nol varès pardabon bisugne di nissun coment, ma che al definìs miôr di tantis peraulis il pês che la aministrazion regjonâl e da aes lenghis propriis de nestre tiere e aes personis che lis fevelin.

Cemût sino cu la metude in vore de leç sul furlan?

Doman, sabide ai 24 di Novembar, alì dal Auditorium dal palaç de Regjon a Udin si ten la prime conference regjonâl su la lenghe furlane. Un apontament previodût de leç 29 dal 2007 sul furlan cun chê di fâ il pont su la metude in vore de leç e di fâ indenant propuestis par svilupâ miôr lis azions di politiche linguistiche.

Ogni discussion e riscje però di deventâ sterpe se no si lasse di bande ogni tentazion di stamp eletoralistic e no si partìs di un esam atent di ce che si à fat fin cumò par meti in vore la leç. Par chest il Comitât 482, su la fonde dei elements cjapâts sù intant de sô ativitât di control sul rispiet des leçs di tutele e di promozion des lenghis minorizadis, al à cirût di meti jù un cuadri dal nivel di metude in vore de leç 29 dal 2007. Il cuadri che indi ven fûr nol è par nuie biel. Par dâi une voglade plui in detai baste dâ un cuc achì.

Viva Onde Furlane ai 5 e 6 di Otubar

Un dai struments par promovi une lenghe al è chel di doprâle intai mieçs di comunicazion, massime se cheste lenghe si cjate intune condizion di minorizazion tant che il furlan. In Friûl la presince de lenghe intai mieçs di comunicazion e je une vore limitade.

Intal cjamp de radiofonie la ecezion principâl e je rapresentade di Radio Onde Furlane che inte sô programazion cuotidiane e ufrìs une presince dal furlan che e je tor dal 70%. Chest al vûl dî che cui che al impie la radio e al va su lis frecuencis di Onde Furlane al pues scoltâ ogni dì, par dut l'an, programs di informazion, di culture, musicâi e di intrateniment par furlan. E dut chest al va indenant di passe 30 agns.

Une presince cussì massive de lenghe furlane intai mieçs di comunicazion no à pareli. Un imprest dal gjenar al à vût e al à une funzion primarie pe promozion de nestre lenghe, e al è - cemût che tancj di lôr a àn ricognossût - un servizi public. Chel istès la aministrazion regjonâl e fâs fature a ricognossi a chest servizi un contribût economic. Baste pensâ che, pai programs radiofonics par furlan, la Regjon e à metût a disposizion pal 2012 mancul di 40 mil euros... Pecjât che, di là de scjarsetât di cheste cifre (di dividi tra lis diviersis radios che, pôc o tant, a trasmetin ancje par furlan), lis risorsis a sedin restadis là che a jerin, ven a dî in Regjon. Cun di fat, si è zaromai in Otubar ma lis domandis fatis indenant inmò in Zenâr pai programs radiotelevisîfs par furlan no àn vude ancjemò rispueste.

Al è ancje par chest che ai 5 e ai 6 di Otubar, alì de aree Festindenda di Cjasielis di Moretan, si davuelzarà une gnove edizion di Viva Onde Furlane, manifestazion di autofinanziament metude adun des associazions "Lenghis dal Drâc" e "Il Cantîr" par judâ la emitente furlane. Fâ un salt alì al vûl duncje dî contribuî a mantignî vive cheste esperience uniche.

Achì o podês cjatâ plui in detai il program des dôs seradis.

Salût a di un amì sart

No vin mai vût la ocasion par cjatâsi di persone cun lui, ma si sin cjatâts tantis voltis a combati lis stessis bataiis. Nô in Friûl, lui in Sardegne. Cun di plui, o vin vût il plasê di dâi acet sul nestri blog, intant che lui nus à ufiert diviers spazis sul so. Propit par cheste sintonie che si veve, no vin pôre a dî che al jere un nestri amì. O fevelìn dal scritôr, sazist e gjornalist sart Gianfranco Pintore.

O sin restâts cuntun grop intal cuel intal savê de sô muart. Une muart che e lasse vuarfine la Sardegne di un pensadôr une vore fin, di un gjornalist di gale e, massime, di un om che si è impegnât cun fuarce e cun inteligjence a pro de sô nazion e de sô lenghe. Par chest o puartìn il nestri corot ai siei di famee, ai amîs e a ducj chei che i son stâts dongje intes sôs bataiis. O crodìn però che no sedi une pierdite dome pe Sardegne, ma ancje par ducj chei popui che a vivin une condizion di minorizazion dentri dal stât talian e che in Gianfranco Pintore a vevin cjatât un compagn di lote e un amì.

Regjon e furlan: pôc e tart

La letare che il segretari politic dal Moviment Friûl, Marco De Agostini, i veve indreçât cualchi timp indaûr al president de Regjon Renzo Tondo par stiçâ l’esecutîf regjonâl a impugnâ la leç statâl di revision de spese e à vût il mert di riclamâ la atenzion, ancje se dome par cualchi zornade, sul teme de lenghe furlane. Di là dai diviers intervents che i son vignûts daûr, cumò che al è passât il vivôr dal dibatiment, la maniere plui concrete par capî a ce pont che o sin cu lis azions di politiche linguistiche pal furlan in Friûl – VJ e je chê di viodi se e trop che la leç regjonâl 29 dal 2007 e je stade metude in vore.

Il teme al ven frontât dal puartevôs dal Comitât 482, Carli Pup, suntun articul publicât sul mensîl La Patrie dal Friûl. La version integrâl dal intervent e je stade invezit metude a disposizion inte sezion documents dal sît dal Comitât 482, par leile baste clicâ achì. Cheste e je la situazion a vuê, ma si pues ancjemò cambiâ. In mancjance di fats concrets però, il rest a son dome cjacaris.

Cjarte europeane: a ce pont sino?

A ce pont sino cul percors di ratifiche de Cjarte europeane des lenghis regjonâls o minoritariis? Il teme al jere al ordin dal dì de riunion di joibe de V Comission de Cjamare dai deputâts, ven a dî chê che si ocupe di belanç, tesaur e programazion. In buine sostance il test nol è stât frontât, ma tornât a mandâ in III Comission par vie che intal confront tra il relatôr, o sei il parlamentâr sart Giulio Calvisi (te foto), e il sotsegretari Gianfranco Polillo (par cui che no sal visàs al è chel dai "oneri aggiuntivi"...) al è vignût fûr che, se pes lenghis minoritariis cjapadis dentri intal proviodiment i "coscj" a son cuvierts de leç statâl 482/99, pal romanì (la lenghe fevelade di rom e sinti) no si à informazions in mert ae cuvierzidure finanziarie. Il test di ratifiche al ven duncje blocât in spiete che la III Comission e fasi un aprofondiment in proposit. Fin chi la informazion; cumò cualchi riflession.

Al sarès di jessi contents, massime in timps là che tocje strenzi la cengle, par cheste atenzion mostrade dai parlamentârs talians pes spesis che a compagnin i proviodiments che a son daûr a prontâ. Pecjât che no mostrin la stesse atenzion par ducj i proviodiments e che, cuant che si trate di garantî i dirits linguistics, in Italie a vedin simpri vût il braç curt, ancje cuant che lis vacjis a jerin grassis...

Al sarès di jessi contents parcè che a voltis fâ une robe mâl al è piês che no fâle e, viodût che il test di ratifiche cumò in discussion al garantìs a furlans, sarts e a altris comunitâts minorizadis une tutele linguistiche che su cierts ponts e je fintremai plui basse di chê previodude de 482, alore al sarès forsit miôr che il proviodiment nol passàs e, chest rimant ae III Comission, al podarès lâ ta chê direzion. Pecjât però che chest al dipendi dome di un resonament sui "coscj" e no sui contignûts dal proviodiment.

Al sarès il câs alore di rindisi cont che, ancje daûr di cheste vicende, la logjiche e je la stesse che e je daûr a segnâ la politiche taliane tai confronts des comunitâts minorizadis: 1) ducj i progrès fats vie pai agns '90 e tal prins agns dal secul gnûf in teme di dirits linguistics a son metûts in discussion (par no dî sot atac) sul plan legjislatîf, juridic e de cuvierzidure economiche; 2) a paiâ il presit plui alt a son chês comunitâts che no àn tratâts internazionâi che lis tutelin o une rapresentance politiche che e sa fâsi valê jù a Rome (e no je tant une cuistion di numars, ma di convinzion). Par fevelâ juste di cjase nestre, ce credibilitât si puedie vê tal pretindi il rispiet dai dirits linguistics dai furlans jù a Rome cuant che la Regjon Autonome Friûl - Vignesie Julie no ju rispiete nancje intai cjamps di sô competence?

Riflessions sardis, ma no dome...

O vin za fevelât dai atacs puartâts dal guvier centrâl aes dôs lenghis minorizadis plui impuartantis dal stât talian, ven a dî sart e furlan. O vin za fevelât ancje dai atacs indreçâts, dispès cu la poie cuant che no cul sburt di une cierte stampe taliane, cuintri de autonomie e de specialitât di ciertis regjons tant che Sardegne e Friûl - Vignesie Julie. Lu vin fat di un pont di viste furlan. Al è però interessant fâlu ancje di un pont di viste sart. Par chest o segnalìn chest intervent publicât sul blog, simpri une vore interessant (ancje cuant che al pues sucedi di no jessi dacuardi cun lui) di Roberto Bolognesi.

E za che o vin citât chest blog, nus somee util segnalâ ancje une altre des riflessions che al propon. Si fevele di Salvatore Meloni. Cence jentrâ intal mert de sô vicende, il dât che al è just marcâ al è che ancjemò une volte si va di là de leç statâl 482/99 e fintremai dal codiç di procedure penâl, tratant il sart di dialet e dineant a Meloni di podê doprâ la sô lenghe. Ancje ta chest câs o invidìn a lei l'intervent di Bolognesi.

A son riflessions fatis di un sart, ma al bastarès cambiâ uns dôs peraulis e a podaressin jessi benon lis riflessions di un furlan.