19/08/08

Libertaris, ma dome a distance

Al somee che plui di cualchi politic di chenti, cuant che al mancje di argoments, nol cjati nuie di miôr che fâi cuintri al insegnament de e in lenghe furlane: tant un gjornâl che al publichi lis sôs declarazions dal sigûr lu cjate. Chest viaç a fâlu al è Gianfranco Leonarduzzi.
Il coment lu cjatais achì.

1 commento:

Comitât 482 ha detto...

A lei la prime rie dal articul publicât sul Messaggero Veneto dai 17 di Avost al pararès che la notizie e je che il politic furlan al à decidût di lassâ il partît radicâl par passâ cul PdL, ma par dut il rest dal toc si fevele dome di furlan a scuele. “Ultimamente in Friuli si è assistito a un regresso della diffusione della lingua friulana, una diminuzione dovuta a molti fattori storici, comunque extra-linguistici” nus spieghe Leonarduzzi, dome che, invezit, di preocupâsi par cheste situazion, le dopre come justificazion par dî che “la materna favella (…) non può rivivere con la forza”. Ma cuale saressie, a so parê, cheste fuarce? Chê de gnove leç regjonâl sul furlan che e previôt che “Tal rispiet de autonomie dai istitûts scolastics, al moment de iscrizion i gjenitôrs o cui che indi fâs lis funzions, dopo di une juste informazion, su domande scrite de istituzion scolastiche, i comunichin ae stesse la lôr volontât di no zovâsi dal insegnament de lenghe furlane” (come 3 dal art. 12 de leç 29/07). E sì, pardabon un “oblic” di vê pôre, une imposizion di fâ voltâ di cjâf…
Ciert, i furlans no son tibetans, e no si pretint che Leonarduzzi al ledi in place a manifestâ pe lôr libertât, ma no sarès une brute robe se magari si rindès cont che, in Friûl, se une lenghe e je stade imponude no je stade dal sigûr chê furlane! No savìn cuale che e sedi la sô “materna favella”, ma se nol à vude une esperience direte, dal sigûr al cjatarà cetancj furlans che a puedin contâi cemût che a scuele ur è stade imponude une lenghe che no jere la lôr e cemût che si ju cidinave in male maniere cuant che a provavin a doprâle! Cui sa, magari par Leonarduzzi al è “illiberale obbligare” dome se si fevele di furlan (che po, come che si à viodût, la leç in realtât no oblee). Forsit al fâs part di chel grup di personis che a son prontis a batisi pe libertât dai popui, ma dome se a son avonde lontans dai confins dal stât là che a vivin...