30/05/08

In mert al furlan intes aministrazions publichis

Intervistât dal Piccolo di Triest, il president de Zonte regjonâl dal Friûl – Vignesie Julie, Renzo Tondo, al à declarât che la leç su la lenghe furlane fate buine te legjislature stade e sarà cambiade.
Prin di dut parcè che si à di gjavâ vie il consens cidin tes scuelis – al spieghe Tondo – e po nol è pussibil imagjinâ di doprâ il furlan tai ents publics. Nol à sens e e sarès une spese grandonone pes cassis publichis”. Si podarès limitâsi a rispuindi che ce che pal president de Regjon “nol è pussibil imagjinâ” in Friûl – Vignesie Julie, al è alc di normâl in cetantis bandis de Europe.
In realtât la cuestion e je inmò plui serie, par vie che ce che il president de Zonte regjonâl nol rive a imagjinâ al è un dirit ricognossût de stesse legjislazion statâl. Cun di fat, a fissâ l'ûs minim de lenghe furlane e di chês altris lenghis minorizadis inte aministrazion publiche, a son in particolâr i articui 7, 8 e 9 de leç 482/99. Tra lis altris robis, la leç e dîs che, propit par permeti ai citadins di doprâ la lenghe minorizade in forme orâl e scrite tai uficis des aministrazions publichis, chestis ultimis a son tignudis a garantî la presince di personâl in stât di rispuindi aes domandis dal public doprant la lenghe ametude a tutele.
I aministradôrs publics a varessin di jessi i prins a rispietâ lis leçs, in câs contrari no si capìs cun cuale autoritât morâl che a domandin un tant ai citadins. No si trate, duncje, di imagjinâ o pûr no di doprâ il furlan tes aministrazions publichis, si trate di rispietâ la leç 482/99 che za lu previôt! O par furlan si intindevial forsit il vin? Parcè che alore, in efiets, il discors al cambie...

25/05/08

Aureli Argemì al interven su la situazion de lenghe furlane

L'inteletuâl catalan antifranchist Aureli Argemì (te foto), fondadôr dal Ciemen (centri internazionâl Escarré pes minorancis etnichis e lis nazions cence stât), al è intervignût su la gnove leç regjonâl di tutele de lenghe furlane intune interviste al setemanâl de Diocesi di Udin "La Vita Cattolica". Chi sot o ripuartìn une sô declarazion e intal prin coment un estrat de sô interviste.

"O vin di partî dal principi che ogni comunitât linguistiche e à i stes dirits. La comunitât linguistiche furlane e à i stes dirits di chê taliane. No si pues fâ une leç di ricognossiment basilâr, come chê pal furlan, par concedi alc, bisugne fâle parcè che o vin dirit di fâle. Lis leçs a van fatis cun coragjo, magari a saran impugnadis di chei che no capissin chescj discors, ma no si à di compuartâsi di minorizâts, di jessi condizionâts su cemût contentâ chei che a àn la 'maiorance' ".

17/05/08

Dirits des minorancis e democrazie

Tal ricuardâ i dîs agns de Cjarte europeane pes lenghis regjonâls o minoritariis, il Segretari gjenerâl dal Consei de Europe, Terry Davis, al à declarât ai 14 di Mai che "lis minorancis no son un incident de storie,e nancje des comunitâts esotichis e suspietis, ma dai elements di fonde dal mosaic european". "La maniere che la maiorance e difint e e promôf i dirits des minorancis, a tacâ di chel di podê doprâ la proprie lenghe, - al à zontât Davis - e je un dai criteris par misurâ il nivel di svilup democratic di un paîs." Al è ce che il Comitât 482 al va dilunc a dî di agns, magari cussì no la realtât dai fats e je sot dai voi di ducj. Baste pensâ che il stât talian al è un dai ultins de Europe a no vê ancjemò ratificât la Cjarte europeane pes lenghis regjonâls o minoritariis. Al ven duncje di domandâsi: se, come che al ricuarde ancje il Segretari gjenerâl dal Consei de Europe, la tutele e la promozion dai dirits des minorancis a son un dai criteris par judicâ il nivel di svilup democratic di un paîs, trop isal democratic il stât talian?

06/05/08

Incuintris cui gnûfs aministradôrs

Ta chestis zornadis a son daûr a rivâ insom i passaçs politics e istituzionâi pe formazion des gnovis Zontis de Regjon, de Provincie e dal Comun di Udin e pal insediament dai gnûfs Conseis di chescj ents. Dilunc vie de campagne eletorâl il Comitât 482 al veve fat indenant a ducj i candidâts un document sui dirits linguistics, cumò si trate di viodi intal concret cemût che lis gnovis aministrazions si movaran ta chest cjamp. Par chest o vin za domandât un incuintri uficiâl cul president de Regjon, Renzo Tondo, e cun chel de Provincie di Udin, Pietro Fontanini. In curt o domandarìn dai incuintris ancje cul sindic di Udin, Furio Honsell, e cui assessôrs che a àn vût o a varan lis deleghis su lis lenghis propriis dal Friûl. A man a man che o varìn lis rispuestis e, massime, che si davuelzaran i incuintris o darìn cont a ducj di cemût che e je lade.

Zurament dal Consei regjonâl

Vuê a àn zurât i gnûfs conseirs regjonâi. Il Comitât 482 al à invidât ducj a zurâ inte lôr lenghe proprie cuntune letare che o cjatais intal prin coment. Ve chi la liste dai conseîrs che a àn doprât une des lenghis propriis de nestre tiere par zurâ. A àn zurât ancje par furlan: De Mattia - LN; Baiutti - PD; Brandolin - PD; Brussa - PD; Franz - Lega; Iacop - PD; Menis - PD; Menosso - PD; Molinaro - UDC; Picco - LN; Violino - LN. A àn zurât ancje par sloven: Brandolin - PD; Gabrovec - Slovenska Skupnost; Kociančič - Çampe - Arc di S. Marc.