Evitìn di dî "ca..dis"!

Ospit di une trasmission radiofoniche de RAI regjonâl, il president dal Friûl - Vignesie Julie al varès dite che par lui la leç su la lenghe furlane imbastide intant de aministrazion Illy e je une "ca..de" e che pal furlan i bêçs si podeve spindiju cuant che si veve bondance, no cumò che e je criùre. La gnove e ven segnalade e comentade intal sît internet dal setemanâl "La Vita Cattolica", cemût che si pues lei achì.

Che pal president de Regjon il furlan nol fos une prioritât si lu veve za capît. Lui stes lu veve declarât sul imprin de legjislature. Chel istès di un rapresentant des istituzions, clamadis par primis a mostrâ rispiet pes leçs e pe lôr metude in vore, e dal president di une Regjon che là sô reson di autonomie aromai e je dome la presince maioritarie di comunitâts che a fevelin une lenghe divierse di chê dal stât, si saressin spietât un compuartament diviers. Si saressin spietâts plui rispiet pai principis che o cjatìn tes convenzions europeanis (che ancje il Friûl - VJ al è clamât a rispietâ), te Costituzion de Republiche taliane, tal Statût di Autonomie e tes leçs statâls e regjonâls; plui rispiet par ducj chei furlans che i tegnin ae lôr lenghe e ae lôr identitât.

O vin simpri cirût di mantignî un nivel di rispiet pes istituzions, ancje cuant che lis vin contestadis pai lôr compuartaments, ma cui che nol à rispiet nol merete rispiet. Se o vin di fevelâ di bêçs straçâts in timps di criùre, no acetìn lezions di cui che cul so pat cun Tremonti al à obleât la nestre Regjon - ven a dî ducj i citadins dal Friûl - Vignesie Julie - a dâi al guvier talian 370 milions ad an in cambi di promessis vueidis. I 370 milions ad an che Tondo i à regalât a Rome a corispuindin ae cifre che la sô aministrazion (basantsi sui numars de finanziarie dal 2013) e spindarès pal furlan in 222 agns. Cui isal alore che al strace pardabon i bêçs? Cui isal - par doprâ lis peraulis di Tondo - chel che al fâs pardabon "ca..dis"?

Cemût sino cu la metude in vore de leç sul furlan?

Doman, sabide ai 24 di Novembar, alì dal Auditorium dal palaç de Regjon a Udin si ten la prime conference regjonâl su la lenghe furlane. Un apontament previodût de leç 29 dal 2007 sul furlan cun chê di fâ il pont su la metude in vore de leç e di fâ indenant propuestis par svilupâ miôr lis azions di politiche linguistiche.

Ogni discussion e riscje però di deventâ sterpe se no si lasse di bande ogni tentazion di stamp eletoralistic e no si partìs di un esam atent di ce che si à fat fin cumò par meti in vore la leç. Par chest il Comitât 482, su la fonde dei elements cjapâts sù intant de sô ativitât di control sul rispiet des leçs di tutele e di promozion des lenghis minorizadis, al à cirût di meti jù un cuadri dal nivel di metude in vore de leç 29 dal 2007. Il cuadri che indi ven fûr nol è par nuie biel. Par dâi une voglade plui in detai baste dâ un cuc achì.

Regjon e furlan: pôc e tart

La letare che il segretari politic dal Moviment Friûl, Marco De Agostini, i veve indreçât cualchi timp indaûr al president de Regjon Renzo Tondo par stiçâ l’esecutîf regjonâl a impugnâ la leç statâl di revision de spese e à vût il mert di riclamâ la atenzion, ancje se dome par cualchi zornade, sul teme de lenghe furlane. Di là dai diviers intervents che i son vignûts daûr, cumò che al è passât il vivôr dal dibatiment, la maniere plui concrete par capî a ce pont che o sin cu lis azions di politiche linguistiche pal furlan in Friûl – VJ e je chê di viodi se e trop che la leç regjonâl 29 dal 2007 e je stade metude in vore.

Il teme al ven frontât dal puartevôs dal Comitât 482, Carli Pup, suntun articul publicât sul mensîl La Patrie dal Friûl. La version integrâl dal intervent e je stade invezit metude a disposizion inte sezion documents dal sît dal Comitât 482, par leile baste clicâ achì. Cheste e je la situazion a vuê, ma si pues ancjemò cambiâ. In mancjance di fats concrets però, il rest a son dome cjacaris.

Regolament pal furlan a scuele: sì stentât in Comission

La VI Comission dal Consei regjonâl e à fat bon, cuntune maiorance pardabon stentade, il regolament pal insegnament de lenghe furlane intes scuelis. Cemût che si veve za vût ocasion di dî, il document al à diviers aspiets che no si puedin judicâ in maniere positive e viodarìn se i elements critics jessûts intant de discussion in Comission a permetaran di cambiâ in miôr il test.

La Comission, in realtât, no jere clamade a dâ un parê su dut il regolament, ma dome suntune part dal document. Chel istès la riunion e je stade la ocasion par segnalâ i aspiets dal regolament che no levin ben. Ta cheste suaze, i vin agrât in particolâr al conseîr dal PD, Paolo Menis, che al à cjapât sù ancje i ponts critics marcâts dal Comitât 482 e ju à segnalâts intant de discussion. A chest proposit, tal spazi dai coments, o publichìn ancje il so comunicât stampe sul argoment.

Il parê positîf de Comission, dut câs, al è dome un dai passaçs che a coventin par rivâ ae aprovazion definitive dal regolament e ae sô metude in vore. Magari cussì no, dopo dai 3 agns e mieç che o vin za spietât, nus tocjarà spietâ ancjemò par tacâ a viodi che si tache a meti in vore le leç regjonâl 29 dal 2007 su la lenghe furlane.

Regolament pal furlan a scuele: ce che nol va ben

La VI Comission regjonâl e varà di dâ un parê sul stampon di regolament pal insegnament dal furlan a scuele metût adun de Zonte regjonâl. Nol è l'unic parê che al covente e, tra une robe e chê altre, prime di vê in man pardabon il test definitîf dal regolament i volarà ancjemò timp. Ven a dî che ancje il prossim an scolastic si inviarà cence che si puedi meti in vore ce che al previôt il regolament (o, ancjemò miôr, il plan aplicatîf che il regolament al cite, ma che al à ancjemò di jessi preparât...). Dut chest par meti in vore une part de leç regjonâl fate buine ancjemò intal 2007. A trê agns e mieç di distance e cun altris ritarts in viste, al sarès plui che a vonde par jessi rabiâts, ma di problemis a 'nd è ancje altris intal regolament imbastît de Zonte. Cuâi sono? Intal spazi pai coments o cjatais il test dal comunicât stampe che il Comitât 482 al à dât fûr su chest argoment.

Politichis pal furlan: la situazion e je grivie, lis responsabilitâts claris

Lis resons par jessi preocupâts pes politichis metudis in at pe lenghe furlane a son tantis.

La gnove leç regjonâl 29/07 e je ancjemò ferme dopo trê agns parcè che la maiorance regjonâl no à fat bon nissun regolament atuatîf. Aromai al è impussibil no interpretâ cheste situazion tant che une volontât clare di impedî che la leç e jentri in vore.

Sul front de scuele, in particolâr, il test fat bon ancjemò l’Astât passât de Comission tecniche incjariade di prontâ il document al è fer intun scansel e la aministrazion regjonâl no à ancjemò dât fûr nancje un test alternatîf. Cun di plui, i bêçs stimâts par inviâ la azion di insegnament par furlan intes scuelis si ju spiete dal guvier talian: viodût i precedents, si riscje di passâ agns prime che alc si movi. Chê maiorance di gjenitôrs che a àn domandât pai lôr fîs la lenghe furlane a scuele e restarà cussì malapaiade par cui sa trop.

Ancje il gnûf contrat di servizi jenfri la Rai e il guvier talian al va cuintri de leç statâl 482. Ancje il pas indenant che si veve rivât a fâ si è scuintrât cul probleme des risorsis. Il risi al è che, ancjemò une volte, e vedi di jessi la Regjon a doprâ bêçs dai siei par vê une presince minime de lenghe furlane intal servizi radiotelevisîf public.

Intant, cui che invezit la lenghe furlane le dopre di agnorums te sô programazion, ven a dî lis radiotelevisions privadis si ricjatin pal secont an di file cu la aministrazion regjonâl che i azere i fonts pes convenzions sui programs par furlan.

La Comission paritetiche, che e veve di viodi di inviâ un percors di trasferiment des competencis dal Stât ae Regjon sul teme des minorancis e de istruzion, no à mot un dêt ta cheste direzion.

E, tant par finî, il gnûf statût de ARLeF – che al varès di jessi al esam de Zonte regjonâl – al previôt di trasferî il podê di indreçament des politichis linguistichis dal Comitât Tecnic Sientific (organisim formât di esperts) al Consei di Aministrazion (organisim di nomine politiche direte) cul risi di incressi inmò di plui il podê discrezionâl dai politics inte programazion e intal finanziament dai progjets pal furlan.

Chest, in struc, ce che a àn spiegât te conference stampe di vuê dopodimisdì i rapresentants dal Comitât 482 e dal Comitât pe Autonomie e pal Rilanç dal Friûl. Se no si mude direzion si riscje di pierdi ancje chel pôc che si à concuistât ta chescj agns: un dam pe nestre lenghe, ma ancje par ducj i furlans e pe specialitât e pe autonomie de Regjon. Nol è plui nissun che al puedi dî “jo no savevi”.

Un coment sui Stâts gjenerâi des lenghis minoritariis

L'assessôr regjonâl Elio De Anna al veve anticipât che chê dai Stâts gjenerâi des lenghis minoritariis e jere une ocasion là che la Regjon e varès scoltât lis propuestis e lis critichis che a rivavin dai sogjets publics e privâts che a son impegnâts sul fronte de promozion des lenghis minorizadis dal Friûl - VJ.

I Stâts gjenerâi si son sierâts îr cu la zornade dedicade ae lenghe furlane. Lis robis ditis a son stadis tantis e dal sigûr cumò la Regjon no pues dî di no vê avonde elements par decidi cemût movisi. Une buine part dai intervents e à marcât il fat che di trê agns la gnove leç sul furlan e je ferme par vie che no son inmò stâts fats bogns i regolaments atuatîfs.

Alore, va ben che la Regjon e jere li par scoltâ, ma almancul une robe e varès podût dîle: parcè, dopo trê agns, cheste aministrazion regjonâl no à fats bogns chescj regolaments? No un suspiet sul parcè za lu vevin e cumò, dopo chescj Stâts gjenerâi, al è ancjemò plui fuart.

Intal spazi dai coments il test integrâl dal intervent dal Comitât 482 in ocasion de zornade conclusive dai Stâts gjenerâi des lenghis minoritariis.

Par no finî intune risierve

La Cort Costituzionâl, ae fin, e à dite la sô in mert ai comis de leç regjonâl sul furlan che a jerin stâts impugnâts dal guvier talian. Par savênt di plui, o podês cjatâ achì il test de sentence.
La leç regjonâl su la lenghe furlane e veve chê di superâ chei pidiments pratics che si veve cjatât par meti in vore la 482/99. Cumò al coventarà cjatâ altris sistemis par superâju.
Ciert al è che cierts passaçs de sentence si fâs fature a glotiju. Al pâr cuasi che a vedin voie di sierânus tune risierve. Il probleme al è che inte storie dal Friûl al è plui facil cjatâ republichis libaris che no risiervis... e, alore, nus tocjarà fâ ce che i furlans a san fâ miôr, ven a dî: resisti.
O vin resistût par secui, o resistarìn ancjemò!

Nomenât il gnûf Comitât Tecnic Sientific de ARLeF

Cu la nomine dal gnûf Comitât Tecnic Sientific de ARLeF – la Agjenzie Regjonâl pe Lenghe Furlane – si varès di jessi rivâts insom cul procès di rignuviment dai orghins istituzionâi regjonâi che a àn di viodi de politiche linguistiche pal furlan. Un procès che, nus somee, al vedi domandât un tic masse timp. Ancje par chel, cumò al è impuartant no pierdint altri e metisi daurman a lavorâ par svilupâ lis politichis pe lenghe furlane daûr di ce che za e previôt la 482/99, ma ancje poiantsi su la gnove leç regjonâl sul furlan.
I fasìn duncje i nestris auguris di bon lavôr ai gnûfs membris dal CTS de ARLeF: Donato Toffoli e Piera Rizzolati pe planificazion linguistiche; Alessandra Burelli e Pierino Donada pe didatiche; William Cisilino e Luca Peresson pai mieçs di comunicazion; e Maria Carminati pe produzion artistiche, musicâl, e multimediâl.

Timps luncs pe sentence de Cort Costituzionâl su la leç 29

Come che nus dîs lenghe.net ai 30 di Zenâr si è metût adun pe prime volte il Consei di Aministrazion de ARLeF. In chê ocasion l'assessôr ae culture Molinaro al à dit che la Regjon e cirarà di “doprâ i istitûts de leç 29 (la gnove leç di tutele de lenghe furlane n.d.r.) che no àn bisugne di regolaments di metude in vore” ancje parcè che i "timps di rispueste de Cort Costituzionâl a laran pes lungjis”. Dal moment che Stât talian nol pues plui dineâ i dirits des minorancis, come che al à fat par passe 50 agns, al pâr che al fasi di dut par slungjâ i timps prime di molâ une vere tutele e duncje par mantignî in vore il stât atuâl di aparteheid linguistiche de lenghe furlane e di chês altris lenghis minorizadis.

Libertaris, ma dome a distance

Al somee che plui di cualchi politic di chenti, cuant che al mancje di argoments, nol cjati nuie di miôr che fâi cuintri al insegnament de e in lenghe furlane: tant un gjornâl che al publichi lis sôs declarazions dal sigûr lu cjate. Chest viaç a fâlu al è Gianfranco Leonarduzzi.
Il coment lu cjatais achì.

Nemo propheta in patria?

Cuant che il Consei regjonâl al à fate buine la gnove leç regjonâl su la lenghe furlane, il Comitât 482 al à lamentât il fat che no si ves olsât alc di plui par svicinâsi ai esemplis positîfs di politiche linguistiche in vore in diviers lûcs de Europe, ma al à ancje ricognossût che si tratave di un pas indenant rispiet a ce che si veve prime.
Chê stesse leç, dut câs, e à cjatât une fuarte oposizion di no pôcs politics de nestre regjon. Une part di lôr al à za dite a clâr che il so test al varà di jessi modificât tes sôs parts di fonde (scuele e aministrazion publiche) e no dal sigûr te direzion che nus plasarès a nô e a cui che al à pardabon a cûr l’avignî de lenghe furlane.
Chel stes proviodiment legjisltîf che une part de classe politiche regjonâl e vûl sdrumâ, al plâs invezit in Sardegne là che si lu cjape di model. Baste cjalâ i contignûts dal Plan 2008 – 2010 pe lenghe sarde fat bon cualchi zornade indaûr de Zonte regjonâl de Sardegne (che si pues discjariâlu achì) par rindisi cont che ciertis liniis di azions a son chês stessis previodudis de leç sul furlan.
Il Plan al è pensât tant che moment di transizion in spiete di fâ buine une gnove leç regjonâl su la lenghe sarde: une leç che e ven domandade a fuart di plui bandis, tra lis altris ancje cuntun apel in rêt (che o cjatais achì). Savêso a cuale leç che si cjale tant che model ta chest apel, che il so test ancje par furlan o podês leilu tal prin coment? Sì, o vês induvinât, propite la gnove leç sul furlan.
Che e sedi vere la detule "Nemo propheta in patria"?

Par Tondo a coventin puescj garantîts par insegnants di lenghe furlane

“Noi siamo una regione di confine, il friulano è una lingua riconosciuta dalla Costituzione e insegnata nelle scuole. Non sarebbe male definire una quota di insegnanti madrelingua, per salvaguardare questo nostro patrimonio.” Cun cheste declarazion, publicade îr (13 di Avost) sul “Corriere della Sera” (la version integrâl dal articul le cjatais achì), il president de Regjon Friûl – Vignesie Julie, Renzo Tondo, al è intervignût intal dibatiment jevât dal parlamentâr furlan de Leghe Nord, Mario Pittoni, che al domande che inte scuele si dedi prioritât intal assegnâ lis incarghis diretivis e lis catedris ai dirigjents e ai insegnants locâi.

Chestis declarazions a mostrin doi aspiets che o judichìn in maniere positive, ven a dî il fat che il president de Regjon al sposte la atenzion plui sul aspiet linguistic che no su chel teritoriâl, e che al marche sei la dibisugne di difindi la lenghe furlane, sei la sô impuartance pal teritori. Cundut a chel, a ‘nd è ancje elements che nus somein contraditoris rispiet ae politiche de aministrazion regjonâl sul furlan e che o varessin gust che a fossin sclarîts. Par lâ plui a fonts inte cuestion, baste lei il prin coment.

Cui sono cumò i estremiscj?

Sarà che o sin tal mieç di Avost e che tancj politics di chenti a son ancje lôr in feriis, ma chest viaç no si à sintût inmò nissun a vosâ cuintri dai “talibans”, dai “integraliscj”, dai “estremiscj” dal furlan! O forsit al è parcè che cheste volte, a dî lis stessis robis che al diseve il Comitât 482 sul insegnament dal e par furlan, e je la Direzion gjenerâl pai ordenaments dal sisteme statâl di istruzion e pe autonomie scolastiche dal Ministeri pe istruzion...

Il rest dal coment su la gnove che us vin segnalât inta chest post lu cjatais achì.

Insegnait par furlan!

Ûs veicolâr de lenghe minoritarie inte scuele, massime par mieç dal CLIL (Content and Language Integrated Learning) come imprest par insegnâ lenghis tant che furlan, sloven e todesc, in aplicazion dai articui 4 e 5 de Leç 482/99: no je la jessude di "4 furlaniscj sfegatâts", ma une indicazion contignude tune circolâr dal Ministeri de Istruzion Publiche (te foto il ministri Mariastella Gelmini), metude jù dal diretôr gjenerâl Mario Dutto. Chi o podês lei la note interie e ancje l'articul jessût sul Gazzettino di vuê.

Lis bausiis sul furlan: juste un esempli

Cuant che si fevele di lenghe furlane, i cuotidians locâi sono dai mieçs di informazion imparziâi o sono imprescj che a judin a fâ disinformazion e a spaurî la int? Clâr che nol è just gjeneralizâ e che lis ecezions a son simpri, ma se o cjalìn a ce che al è saltât fûr sul argoment inta chescj agns al ven plui facil di pensâ ae seconde ipotesi. Un esempli di cheste ande si lu cjate propit ta chestis zornadis (ai 5 di Avost) su lis edizions di Pordenon dal Gazzettino e dal Messaggero Veneto. Par savênt di plui provait a dâ un cuc achì. Te foto, il Sindic di Pordenon Bolzonello, protagonist di cheste vicende che Pordenon no sarès furlane.

E vie Pordenon...

La aministrazion comunâl di Pordenon e à chê di gjavâsi fûr de zone là che si metarà in vore la gnove leç regjonâl su la lenghe furlane. Le propueste e varès di jessi votade za lunis che al ven.
Dal sigûr il furlan al è za di un biel pieç che nol ven fevelât in citât tant che lenghe native, ma al ven doprât di chei che a son vignûts a stâ o a lavorâ in citât de aree furlanofone dal Friûl ocidentâl. E no 'nd è pôcs. Come che a 'nd è ancje di citadins imigrâts che a varessin gust che i lôr fîs a imparassin la lenghe furlane e che lu àn testemoneât tal moment de iscrizion a scuele. Pal Comun di Pordenon, duncje, chescj citadins no valin come chei altris.
Dut câs, forsit, la robe piês al è che Pordenon nol è dome Comun, ma ancje cjâf lûc di Provincie, une Provincie là che la lenghe furlane e je ancjemò ben vive. Se Pordenon al vûl gjavâsi de zone là che si met in vore le leç sul furlan che lu fasi, ma che nol pretindi di rapresentâ dut il Friûl ocidentâl!
Cuâi i coments ae volontât de aministrazion comunâl pordenonese? Tal prin coment o cjatais chel dal vicepresident de Societât Filologjiche Furlane pal Friûl ocidentâl.

Incuintri dal comitât pe autonomie pal rilanç dal Friûl cul president Tondo

Il Comitât pe autonomie e pal rilanç dal Friûl ai 25 di Jugn dal 2008 al à vût un incuntri cul president de Regjon Tondo (te foto, un moment de riunion) e, cualchi dì prime, cul assessôr regjonâl pe culture Molinaro. Tra lis diviersis tematichis frontadis ancje chel de lenghe furlane e in particolâr de gnove leç di tutele. Tondo e Molinaro a àn declarât la lôr disponibilitât a difindi la leç denant de Cort Costituzionâl. Un segnâl positîf di bande di une Zonte che fin cumò a 'nd à dâts cetancj di negatîfs. Sperìn che cheste e sedi une buine ocasion par vierzi un vêr dialic su la tematiche dai dirits linguistics cu la gnove aministrazion regjonâl. Chi o cjatais une rassegne stampe sul incuintri.

Par Argemì furlan obligatori a scuele

Ancjemò un intervent sui dirits linguistics dal popul furlan di bande di Aureli Argemì, inteletuâl catalan president dal CIEMEN za perseguitât di Franco pe sô azion di difese de lenghe catalane. Tabaiant a un incuintri cutun grup di gjornaliscj ladins e furlans al à dit che "la gnove leç di tutele [de lenghe furlane n.d.r.] e je masse debule. Si à di domandâ dut ce che al è just par une tutele serie. Il dirit ae lenghe e a pandile in ogni mût al è un dirit de persone: il furlan al à il dirit di jessi fevelât in plen, il stes dirit che al è pal talian, ni plui ni mancul". Sul teme particolarmentri discutût dal insegnament de lenghe furlane a scuele, Argemì al à declarât che " e à di jessi la obligatorietât, no si discût. Par esercitâ in plen il dirit dai furlans che si diseve prin. Po dopo cussì ancje i talians a vegnin a cognossi la lenghe che a àn dongje".

L'articul complet su la cunvigne in Ladinie dulà che al è intervignût Argemì si cjatilu tal ultin numar de Patrie dal Friûl.

Il vescul e il president

Leint il Gazzettino di vuê o cjatìn un articul che al fevele di un sgambi di batudis tra il President de Regjon Renzo Tondo e l'Arcivescul di Udin bons. Pietro Brollo (te foto).
O preseìn la declarazion dal bons. Brollo che al dîs: "Il furlan nol è un probleme: al è un valôr". E je une posizion che al à cjapât plui voltis e che nus fâs plasê. Dut câs, dal moment che si fevele di Glesie, o profitìn par fâ ancje une domande ae Arcidiocesi: ce fin aial fat il Messâl Roman par furlan, che al è fer a Rome dal 2006? O sperìn che i vescui dal Friûl a fasin sintî la lôr vôs alì de Cei par che alc si movi.
Par cui che nol savès, la motivazion e je une vore banâl, ma avonde ofensive pai furlans: la Cei no à voie di aprovâ la traduzion par furlan de Tertia editio typica, parcè che prime e à di sei finide chê par talian... Robis di no crodi!
Par savênt di plui su la cuistion dal Messâl, lait a lei il sît di Glesie Furlane e il sît de Patrie dal Friûl.

Tal prin coment, us metìn l'articul dal Gazzettino