15/12/10

Cuant che si è indaûr di 150 agns…

Dôs setemanis indaûr il Comitât 482 al à vût un incuintri cul senatôr Fabrizio Morri, de Comission parlamentâr di vigjilance Rai, par fâ il pont su la metude in vore de leç 482/99 inte radiotelevision publiche. Il cuadri che nus à presentât al jere clâr: intal contrat di servizi gnûf si à metût dentri ancje il furlan tra lis lenghis di doprâ inte programazion locâl de RAI, ma la dirigjence de concessionarie no veve ancjemò firmât il contrat. Chel istès, ancje une volte firmât, la partence di une programazion continuative par furlan no sarà automatiche, almancul fintremai che no ven sigurade la cuvierzidure finanziarie. Si va duncje indenant cul violâ la 482/99, o sei la leç che e varès di meti in vore l’articul 6 de Costituzion de Republiche taliane.
Par chest e sune inmò plui vergognose la campagne pal rignuviment dal abonament Rai in onde ta chestis zornadis e che e riclame i 150 agns de proclamazion dal ream de Italie. Une campagne che, cemût che al à scrit il storic de leterature taliane Franco Brevini, e sparnice la idee che la pluralitât linguistiche dentri dal stât talian e je sotculture e che eliminâle e je une opare meretorie.
Ta chest câs sì che la Rai e à tirât dentri il furlan, no par dâi chel che i spiete par leç ma par umiliâlu ancjemò une volte. Par fortune la reazion no si è fate spietâ, sei dentri (un pâr di esemplis chi e chi) che fûr dal Friûl (cjalait chi). Altri che “fratelli d’Italia”, ancjemò une volte la Rai e fâs fîs e fiastris!

12/12/10

Segnaletiche bilengâl? In Europe e je normâl.

E je di vuê la gnove polemiche che si cjate sul Messaggero Veneto su la segnaletiche bilengâl talian/furlan. O podês leisi l'articul dal M.V. achì. Al pâr che dome in Friûl al sedi il "scandul" dai segnâi bilengâi, ma la Europe (e no dome) e je plene di segnaletiche bilengâl. Juste par fâsi une idee us conseìn di lei cheste pagjine di wikipedia. Strani che dome in Friûl dut chest al sedi cussì problematic. Fosit cualchidun al pense che i furlans a sedin ducj ignorants e che al basti pôc par spaurîju di mût che no domandin plui ce che al è un lôr dirit.

09/12/10

Comunicât stampe dal Comitât 482

Il Comitât 482 al à publicât chest comunicât stampe (che o cjatais ancje intal prin coment) di rispueste al articul “Inchiesta sul friulano, minacce a Cerno” publicât îr dal Messaggero Veneto.

"In un articolo intitolato 'Inchiesta sul friulano, minacce a Cerno' pubblicato sul Messaggero Veneto in data 8 dicembre 2010 si cita più volte il Comitato 482 in riferimento a offese e minacce indirizzate al giornalista Tommaso Cerno.
In tale articolo si legge che il profilo 'Il Friuli aspetta ancora le scuse da Tommaso Cerno e dall’Espresso' su cui si trovano le offese e le minacce a Cerno 'farebbe capo al Comitato 482'. Tale affermazione è del tutto falsa e chiediamo venga rettificata. ..."

08/12/10

Strumentalizazion des posizions dal Comitât 482

Sul Messaggero Veneto di vuê si publiche un articul (che o cjatais tal prin coment) là che si clame in cause il Comitât 482 cun riferiment a ofesis e menacis indreçadis al gjornalist Tommaso Cerno. Prin di dut o volìn sclarî che la pagjine di Facebook là che si cjatin ofesis e menacis ("Il Friuli aspetta ancora le scuse da Tommaso Cerno e dall’Espresso") no à nuie a ce viodi cul Comitât, ancje se dentri si cjatin riferiments e citazions al Comitât stes. O lin dilunc a dî che no sin dacuardi cul articul “We speak furlân” publicât di Cerno sul Espresso intal Avost dal 2009, ma no podìn acetâ che di chê strade si indrecin ofesis o, inmò piês, menacis tai confronts dal autôr dal articul. Al è un mût di fâ contrari al mût di jessi e di compuartâsi dal Comitât 482 e lu vin dimostrât cui fats di cuant che o sin nassûts. Al è ofensîf che si puedi ancje dome pensâ il contrari.

07/10/10

Alcìn il volum de radio!

Magari cussì no, daspò dal ultin intervent là che us vin contât ce che al è sucedût sul front politic in mert al azerament dai fonts pai programs radiotelevisîfs in lenghe furlane su lis emitentis locâls, al è pardabon pôc ce zontâ.
Se dal "alt" no rivin rispuestis al è duncje ancjemò plui impuartant che a rivin almancul dal "bas". Daûr di cheste logjiche une des realtâts plui colpidis di chest tai, ven a dî Radio Onde Furlane, e à inmaneât par sabide ai 9 di Otubar un apontament di finanziament popolâr che si davuelzarà a tacâ des 5 tal daspomisdì a Cjasielis di Mortean, alì di Festintenda. Si trate di une serade di fieste cuntun concierton di no pierdi cul miôr de musiche furlane: i 10 euros de jentrade a coventaran par judâ a tignî impiade la radio.
Alore anìn ancje nô, alcìn il volum de radio e fasìn sintî ancje intai "plans alts" de politiche la vôs libare dai furlans!

19/09/10

Programs radiotelevisîfs par furlan: ce si movial?

Cualchi zornade indaûr il Comitât 482 al à partecipât ae conference stampe inmaneade di Informazione Friulana / Radio Onde Furlane par denunciâ il tai totâl dai fonts regjonâi pai programs radiotelevisîfs in lenghe furlane su lis emitentis locâls.
Dongje des declarazions di solidarietât rivadis di plui bandis, il prin at concret al è stât chel dal conseîr regjonâl de Slovenska Skupnost / Union Slovene, Igor Gabrovec (te foto), che al à presentât une interogazion al president de Regjon là che si domande ae aministrazion regjonâl di rindi cont di cheste situazion e di proviodi a superâle (intal spazi dai coments o cjatais il test dal comunicât stampe de SSk). Si trate di un at impuartant ancje parcè che al dimostre, contrari di ce che cualchidun al va ator a dî, che e esist une solidarietât reâl tra cui che si bat pai dirits dai slovens e cui che si bat pai dirits dai furlans.
Sul Gazzettino di sabide o cjatìn, par bocje dal assessôr Roberto Molinaro, la prime rispueste de bande dal esecutîf regjonâl (intai coments o metìn dut l’articul). Nol è di vê pôre – al dîs l’assessôr – parcè che i bêçs a saltaran fûr. Chel istès, a son almancul doi ponts che a meretaressin sclarîts:
1) L’assessôr al dîs che “Non è vero che la Regione ha azzerato i contributi per le trasmissioni in lingua friulana nelle radio e televisioni private”. Ma se inte finanziarie pal 2010 o vevin zero euro par cheste vôs e inte manovre di assestament di belanç o ‘nt vevin simpri zero, cemût si puedial dî che no son stât azerâts?
2) Se e je vere che i programs par furlan a saran finanziâts, cun cuâi bêçs si fasaraial? L’assessôr al rispuint “Con i fondi che si renderanno disponibili nella finanziaria 2011”. Se i fonts de finanziarie 2008 a levin pes convenzions pal 2009, chei dal 2009 pes convenzions pal 2010, chei de finanziarie pal 2011 no larano a finî tes convenzions pal 2012? No mancjial un an? O si pensial di meti dut intun i fonts par doi agns (ametût che suntun belanç anuâl al sedi pussibil)?
Nô o restìn in spiete di rispuestis, miôr ancjemò se compagnadis di ats concrets…

14/09/10

Comunicât Stampe: azerament des risorsis pe radio e pe television par furlan

Ve chi il test dal Comunicât stampe dal Comitât 482 sul gnûf tai ai finanziaments regjonâi pe lenghe furlane.
"Il Comitât – Odbor – Komitaat – Comitato 482 è impegnato ormai da quasi un decennio nella difesa dei diritti linguistici delle comunità del Friuli. Grazie a questa presenza costante possiamo affermare che, se le difficoltà non sono mai mancate, è piuttosto evidente che in questo ultimo periodo ci troviamo di fronte ad una pericolosa involuzione nell’ambito della politica linguistica regionale che potremmo riassumere in tre punti: riduzione delle risorse; assenza di une linea di azione strategica ben delineata; mancata attuazione della legislazione in vigore..."

03/09/10

A proposit di Resie

Di secui in Friûl a vivin adun comunitâts che a fevelin lenghis diviersis, dispès declinadis in plui varietâts locâls. Al è un dai elements che a insiorin la nestre tiere. Cheste pluralitât e à però puartât daûr ancje un tic di ambiguitât intal ûs de peraule “furlan” (tal sens che a voltis si le dopre par indicâ ducj chei che a vivin dentri dal cussì clamât Friûl storic, e a voltis dome chei che a àn tant che lenghe proprie il furlan) e, ciertis voltis, dal stes concet di Friûl.

La Val di Resie e je in Friûl. Su chest no son dubis. Al è clâr che alore, di un pont di viste gjeografic / teritoriâl, i siei abitants si puedin tignî di furlans. Chel istès no son dubis sul fat che Resie e je intal stât talian e, duncje, cui che al vîf alì al è un citadin talian (ma ocjo a no confondi concets tant che citadinance, nazionalitât e partignince linguistiche). La lôr lenghe però no je chê ladine furlane, ma une varietât slovene. Une varietât che e à caratars avonde particolârs, al pont di atirâ la atenzion di cetancj studiôs, ma che ducj i linguiscj seris a calcolin de famee slovene. Sul sens di partignince dai roseans (ma ancje di cualsisei altri) al è dificil di dî alc par vie che si trate di sintiments personâi: ognidun le pense come che al vûl e al à dirit di fâlu.

Chel istès, al è za di un pôc di timp che cualchidun al vûl imponi a ducj i roseans la sô concezion identitarie. Par fâlu, tra lis altris, al conteste la aplicazion de leç statâl 38/2001 che no impon nuie a di nissun, ma e lasse la libertât a cui che al vûl di esercitâ i siei dirits linguistics. Un di chescj dirits al è, par esempli, chel di vê une cjarte di identitât bilengâl. Se un nol à voie di vê il document in dôs lenghis baste che no lu domandi, nissun lu oblee. Ma par cualchidun nol è avonde, e alore al atache cui che al esercite chest dirit e lu intimidìs: al è un mût di fâ pardabon incivîl, che nol è justificabil e che no si pues acetâ.

Cumò, di chei stes ambients, si volarès fintremai cjapâ dentri i roseans inte comunitât di lenghe furlane. Cussì no dome si va di là di ogni criteri sientific o linguistic, ma si va fûr di ogni gracie di Diu! E al è di sgrisulâsi a pensâ che a puedin jessi dai aministradôrs che i dan cuarde a cui che al fâs propuestis dal gjenar. Achì no je cuistion di parts politichis, ma dome di bon sens. Se no le finìn cun dut chest tuessin o riscjìn di cjatâsi ducj invelegnâts…

29/08/10

Mostre la muse! Il Comitât 482 al è su facebook

Il Comitât 482, la organizazion che dal 2002 al si bat pai dirits linguistics dal popul furlan, al à vierte la sô pagjine uficiâl su facebook. Se ancje tu tu âs une pagjine su facebook sosten il Comitât e fasilu cognossi a ducj i tiei contats!

28/07/10

Fevelâ par furlan in Consei comunâl: un dirit o une strade di rive sù?


Intai Comuns che si cjatin intal teritori là che e vîf une comunitât minorizade ricognossude, i membris dai Conseis comunâi (ma il stes al vâl par chei des Comunitâts di mont, des Provinciis e des Regjons) a àn il dirit di doprâ intant de lôr ativitât la lenghe de lôr comunitât. A dîlu al è l'articul 7 de leç statâl 482/99.
Il principi al è un vore clâr, ma la sô aplicazion e à cjatât no pôcs pidiments. Il câs che i à capitât a Bruno Colledani, conseîr comunâl di Spilimberc, al è avonde significatîf. Tal prin coment o cjatais ce che nus à scrit e che nus somee impuartant che ancje voaltris o vedis ocasion di lei.

12/07/10

Visite dal president Napolitano in Friûl

Us informìn che, in ocasion de visite dal president de Republiche taliane Napolitano in Friûl, il Comitât pe Autonomie e il Rilanç dal Friûl al à invidât i furlans a dâi il bon acet cu lis bandieris dal Friûl par ricuardâi la situazion di minorizazion de comunitât furlane.
L'apontament al è par miercus ai 14 di Lui a 9 e mieze di matine in place dal Lionello a Udin. 

24/06/10

Visite dal Comitât Consultîf in Friûl

Intant de audizion fate pe visite in Friûl dal Comitât Consultîf  su la Convenzion Cuadri su lis minorancis nazionâls il Comitât 482 al à presentât chest rapuart su la situazion de minorance furlane. Inte foto la piçule manifestazion di furlans in spiete de delegazion europeane.

22/06/10

Il furlan i plâs ai zovins

A proposit di zovins e lenghe furlane o segnalìn chest toc di Marco Stolfo publicât lunis ai 21 di Jugn sul cuotidian E Polis Friuli e che si pues leilu intal prin coment.

21/06/10

La Europe e controle la metude in vore de Convenzion cuadri pe protezion des minorancis nazionâls in Friûl



Ai 23 di Jugn a rivaran a Udin i rapresentants dal Comitât european che al viôt de Convenzion cuadri pe protezion des minorancis nazionâls e a varan un incuintri cui rapresentants des realtâts associativis impegnadis inte promozion des lenghis minorizadis dal Friûl. Il Comitât 482 al sarà presint al incuintri e al consegnarà un gnûf rapuart su la situazion de minorance nazionâl furlane ai rapresentants europeans.
Tal prin coment o cjatais un articul di Andrea Valcic su la visite dai rapresentants europeans.

18/06/10

Istitût bilengâl di S. Pieri: un patrimoni di difindi

L’istitût bilengâl sloven - talian di S. Pieri dal Nadison al è un esempli unic – no dome in regjon, ma ancje a nivel talian – di scuele che e ufrìs un percors di istruzion pardabon plurilengâl a partî de lenghe proprie dal teritori là che si cjate. Si trate di une realtât nassude dal teritori, cuntune cualitât fûr di dubi che le à fate deventâ la scuele plui frecuentade des valadis dal Nadison.
Chel istès, cumò si cjate intune situazion dificile par resons che no son di nature pratiche (cemût che cualchidun al volarès fâ crodi), ma di nature politiche. Si trate di un episodi che al è facil di meti dentri intune campagne simpri plui penze cuintri de comunitât slovene dal Friûl. Al è alc che no si pues justificâ, ancjemò di plui cuant che a paiânt il presit a son i fruts. Par chest il Comitât 482 al è dongje dai gjenitôrs che si son mobilitâts par difindi l’avignî de scuele.
Vuê, a siet sot sere, a àn ancje inmaneât une manifestazion che, a partî de glesie parochiâl e sfilarà dilunc de statâl 54 par rivâ alì dal palaç dal Comun. Une manifestazion che e cjate la plene poie ancje dal nestri Comitât.
Intal spazi dai coments o cjatais ancje un comunicât dal grup dai gjenitôrs che al spieghe in detai la cuestion.

25/04/10

Une Resistence che e va indenant


Ai 25 di Avrîl e cole la fieste de Liberazion dal nazifassisim. Un inovâl che al ricuarde il sacrifici di tancj di lôr che a àn lotât par concuistâ la libertât e par fâ sù un mont plui just. A passe sessante agns di chei fats, cul smamîsi de lôr memorie direte, si tint a dâ par scontade la libertât che e je rivade di chê lote popolâr. La libertât, invezit, no je mai scontade e si à simpri di impegnâsi par tignîle vive.
La vitorie sul nazifassisim, dut câs, no à puartât la fin des bataiis pe libertât, pe democrazie, pai dirits. Chestis lotis a àn viodût dispès in prime linie propit chei che a vevin fat la Resistence. Chest al vâl ancje pes bataiis pai dirits linguistics, pes nazionalitâts tibiadis, pal autoguvier. Nol è un câs che, juste par fâ un esempli, un dai prins parlamentârs a sburtâ par une leç pal furlan e par chês altris lenghis minorizadis al fos Mario Lizzero “Andrea” (te foto), un dai oms di ponte de Resistence furlane.
Magari cussì no, su chest front al reste ancjemò tant ce fâ. Lis nazionalitâts e lis lenghis minorizadis, dut câs, a cognossin ben il significât de peraule Resistence, dal moment che masse dispès e je stade la uniche forme di esistence che ur è stade permetude se no volevin jessi scanceladis o vualivadis. Par chest, vuê come îr, in Friûl come inaltrò, la Resistence e va indenant.

03/04/10

3 di Avrîl - fieste nazionâl dal Friûl

In ocasion de fieste nazionâl dal Friûl dai 3 di Avrîl us proponìn cheste riflession di pre Toni Beline e us invidìn a meti la bandiere dal Friûl (la acuile su font blu dal patriarcje Beltram) sui barcons di cjase vuestre.


29/03/10

Letare vierte ai parlamentârs furlans

La professore Silvana Schiavi Fachin, esperte di insegnament plurilengâl, e à scrit une letare vierte ai parlamentârs furlans Pegorer, Saro e Pittoni in relazion ai lôr dubis su la pussibilitât di meti in vore lis propuestis fatis dal Comitât pe Autonomie e il Rilanç dal Friûl inte conference stampe di lunis passât. Intal prin coment o cjatais il test de letare.

25/03/10

Letare vierte a Tondo e Molinaro

Il Comitât 482 al à scrit une letare vierte al president de regjon Tondo e al assessôr regjonâl pe culture Molinaro sui ritarts inte politiche di tutele des minorancis linguistichis inte regjon Friûl - Vignesie Julie. Lei la letare achì.

22/03/10

Mobilitazion pai dirits dal Friûl

Lunis ai 22 di Març e je stade presentade, intant di une conference stampe che si è tignude a Udin, une propueste ae Comission Paritetiche Stât / Regjon par prontâ des normis di atuazion dal Statût di autonomie regjonâl che a garantissin formis di tutele plui largje pe lenghe furlane. La iniziative e je stade inmaneade dal Comitât pe autonomie e pal rilanç dal Friûl cu la colaborazion di altris sogjets. Ancje il Comitât 482 al à dât il so contribût e achì o podês cjatâ la riflession che o vin fat par cheste ocasion.

21/03/10

Aghe e dirits: une bataie cence confins


Ai 22 di Març e cole la Zornade internazionâl de aghe. Pe ocasion us proponìn la traduzion par furlan, curade di Licio De Clara (Serling), de letare pastorâl dal vescul Luis Infanti Della Mora che al partìs propit dal teme de aghe par svilupâ une riflession impuartante su lis responsabilitâts di ogni persone inte lote pe dignitât dal om e pe difese de nature.
Il vescul, che al è di divignince furlane, al fevele prin di dut de situazion che al à sot dai voi intal so teritori, o sei la part de Patagonie che e je in Cile, ma i temis che al fronte no àn confins e a son impuartants ancje par nô che o vivìn ta cheste bande dal mont: il valôr de aghe; il rapuart dal om cu la tiere e cu lis risorsis naturâls; i pericui che cierts sistemis economics a àn su chest ecuilibri; il svilup di modei che no fischin il teritori; la solidarietât cun chei altris popui.
Il Comitât 482 al è impegnât sul front dai dirits linguistics, parcè alore tocjâ chescj temis? Prin di dut parcè che no vivìn fûr dal mont cemût che cualchidun al volarès fâ intindi: il nestri impegn al è dentri de societât furlane e la nestre lote e je peade a chês altris bataiis pai dirits, come che o vin ricuardât plui voltis ancje par mieç de ZFD. E po parcè che ta chest cuadri di rispiet pal ambient e pal om a àn un puest di prin plan ancje lis lenghis. Cun di fat, fevelâ di difese dal ambient e dal teritori e lassâ fûr lis lenghis che ta chel teritori a son nassudis e si son svilupadis e sarès dome ipocrisie.

20/03/10

Dongje dai lavoradôrs furlans

Ai 19 di Març cualchi miâr di furlans – lavoradôrs, students e pensionâts, nassûts achì o rivâts di inaltrò – al à sfilât pes stradis di Udin in rispueste ae clamade di Cgil, Cisl e Uil de provincie di Udin. E je stade la manifestazion di place plui partecipade che si à viodût in Friûl intai ultins agns.
Tal mieç di dute chê int a jerin ancje un pôcs di membris dal Comitât 482 che a àn sfilât in forme anonime, cence bandieris e cence strissons, par pandi la lôr solidarietât a chei lavoradôrs che a lotin pal difindi il lôr puest di vore (e, magari cussì no, a ‘nd è pardabon tancj: de Safilo di Martignà e di Prissinins ae Leader Pumps di Trasaghis, juste par fâ doi nons), ma ancje par testemoneâ la voie di tornâ a puartâ la “cuestion furlane”, cun dutis lis sôs musis, al centri de atenzion.
Se cheste crisi e à mostrât in maniere clare i problemis de economie furlane, e je ancje vere che la situazion e je penze ancje su altris fronts, cuntun Friûl simpri plui margjinalizât e viodût juste tant che teritori di servizi par infrastruturis che a coventin a altris; un Friûl che si volarès cence vôs e cence identitât. La manifestazion di vuê, almancul in part, e tacave a poni chest probleme.
Si trate, alore, di pensâ e di meti in vore un gnûf model di svilup pe nestre tiere. Nô o crodìn che si puedi e si vedi di cjapâ cheste strade e o crodìn ancje che cualsisei progjet che al vueli lâ ta cheste direzion al sarà çuet se nol promovarà e nol valorizarà la nestre identitât, a tacâ des nestris lenghis: furlan, sloven e todesc. Lenghis che a puedin ancje jessi une risultive di svilup. Se dome si volarà investî su di lôr cun convinzion.
In place a jerin tantis bandieris dal Friûl: un segnâl che alc si à dismot. In place si sintive tancj di lôr a fevelâ par furlan, intant dai discors uficiâi no: un segnâl che alc al à ancjemò di dismovisi.

15/03/10

La Italie come la Cine?

O leìn sul sît de agjenzie reuters che lis lenghis des 56 minorancis linguistichis ricognossudis de Cine a son in pericul di estinzion par vie de politiche di assimilazion metude in vore dal regjim di Pechin. In particolâr la imposizion di bande dal Stât cinês dal mandarin tant che uniche lenghe di podê doprâ inte scuele e je une des resons plui fuartis di preocupazion pe lôr sorevivence. Par dî la veretât, se o cjalìn al spazi che i ven lassât al furlan a scuele (e no dome li), no nus somee che il Stât talian si compuarti cetant miôr dal regjim cinês cu lis sôs minorancis linguistichis.

13/03/10

Pai dirits dal popul furlan

Al è stât screât il gnûf blog dal Comitât pe autonomie e il rilanç dal Friûl. Il Comitât al à colaborât cetantis voltis insieme al Comitât 482 inte lote pe rivendicazion dai dirits fondamentâi dal popul furlan.

27/02/10

27 di Fevrâr: Zornade Furlane dai Dirits

"Al è zaromai di un pôcs di agns che, ai 27 di Fevrâr, il Comitât 482 al celebre la Zornade Furlane dai Dirits. Chê date, di fat, e ricuarde la Joibe Grasse dal 1511 cuant che si impià il riviel popolâr plui grant inte storie dal Friûl: un episodi storic che, fûr di ciertis leturis stereotipadis che cualchidun al va dilunc a proponi, al mostre a clâr che lis comunitâts furlanis a jerin prontis a doprâ ogni mieç par difindi i lôr dirits."
Al tache cussì il messaç dât fûr dal Comitât 482 pe Zornade Furlane dai Dirits. La version integrâl dal test le cjatais intal spazi dai coments o ben sul sît dal Comitât.
Buine Zornade Furlane dai Dirits a ducj!

26/02/10

Doman la ZFD su Onde Furlane

Zaromai di un pôcs di agns, Radio Onde Furlane, cu la poie dal Comitât 482, e celebre la Zornade Furlane dai Dirits cuntune programazion speciâl che e à chê di stiçâ la riflession sui dirits dai furlans e su lis bataiis inviadis par difindiju. Un apontament che, ta chest 2010, si cubie cui 30 agns de emitente par puartâ ancje altris elements di novitât inte programazion. Doman, sabide ai 27 di Fevrâr, lis trasmissions dedicadis ae ZFD a tacaran tor nûf mancul un cuart di buinore (8.45) e a laran indenant par dut il dì. Intai coments o publichìn il comunicât stampe dât fûr de emitente furlane pe ocasion.

19/02/10

Cunvigne in Senât pai 10 agns de 482

'Le minoranze linguistiche in Italia dalla legge 482 del 1999' al è il titul de cunvigne promovude dal Senât de Republiche taliane in ocasion dai 10 agns de leç 482. Lunis ai 22 di Fevrâr a'nt fevelaran il president de comission dirits umans di Palaç Madama, Pietro Marcenaro, l'innomenât linguist Tullio De Mauro e il diretôr dal servizi des prerogativis, des imunitâts parlamentârs e dal contenziôs dal Senât, Luigi Ciaurro. Viodût che la leç 482, dopo 10 agns de sô aprovazion, e je in buine sostance ancjemò no aplicade sperìn che cheste cunvigne e sedi une ocasion par un bon esam di cussience di bande de classe politiche taliane.

La Slovenie e ricuarde lis mancjancis dal Stât talian inte tutele de minorance slovene

Inte sô relazion denant dal grup di lavôr dal Consei des Nazions Unidis pai dirits dal Om la Slovenie e à denunciât lis mancjancis dal Stât talian e de regjon Friûl - Vingnesie Julie inte politiche di tutele de minorance slovene. In prin plan e je stade puartade la cuestion dal finanziament insuficient aes organizazions culturâls e sportivis di lenghe slovene. Al è stât ricuardât ancje che lis tramissions televisisvis slovenis prodotis de RAI no si puedin ancjemò viodi inte provincie di Udin e il probleme de grafie doprade intai gnûfs cartei bilengâi metûts intal comun di Resie.

14/02/10

Pari nestri par furlan inte Sagrada Familia

La preiere dal Pari Nestri e sarà metude ancje in lenghe furlane sul portâl di bronç de glesie de Sagrada Familia di Barcelone. Un segnâl impuartant di bande de societât e de Glesie catalane a favôr de lenghe furlane e dal so ûs liturgjic. Pal popul furlan, che al spiete di plui di 4 agns la promulgazion dal messâl par furlan de bande de C.E.I., un motîf di plui par tignî dûr e no molâ inte rivendicazion dai siei dirits linguistics fondamentâi.

30/01/10

Al siere Lenghe.net

Al siere il sît di informazion par furlan lenghe.net che dal 2004 al garantive un servizi di informazion su internet e che al è un dai membris dal Comitât 482. Lis motivazions che a àn puartât a cheste sielte de bande de redazion si puedin lei intal editoriâl dal diretôr responsabil Anna Bogaro.

22/01/10

Glesie Furlane: difindi une minorance al è un dirit e no un delit

Us segnalìn cheste biele interviste a pre Romano Michelot publicade dal Messaggero Veneto li che si ricuarde che la cuestion de tutele dai dirits de minorance furlane (e di chês altris minorancis) no pues jessi secondarie o margjinâl intal operâ de Glesie in Friûl.

18/01/10

Il furlan intal consei comunâl di Spilimberc

La iniziative dal zovin conseîr comunâl di Spilimberc Bruno Colledani che al fâs i siei intervents dome in lenghe furlane je daûr a mostrâ a ducj che la leç 482 inte sostance no ven aplicade e che la garanzie dai dirits linguistics dai citadins di lenghe furlane e no je ancjemò la normalitât intes istituzions dal Friûl. Par chest la sielte di chest conseîr e je un esempli impuartant par ducj i furlans.

13/01/10

Atacs de stampe taliane: ancjemò denunciis

A rivin ancjemò denunciis di citadins furlans cuintri dai autôrs de campagne antifurlane fate de stampe taliane inte seconde part dal 2009. Dopo di chês presentadis a Udin e a Tumieç, cumò e je la volte di 3 denunciis presentadis a Pordenon. Un struc dai contignûts si pues cjatâlu achì.

09/01/10

ARLeF e Udin: une gnove sinergjie pe lenghe furlane

Come che nus informe lenghe.net domenie ai 10 di Zenâr intal sît de Udinese si podarà scoltà ancje il coment in direte de partide dal Udin par furlan in gracie de convenzion fra la societât e la ARLeF. Dopo de traduzion dal sît uficiâl de scuadre ancje par furlan duncje, une altre impuartante novitât pe promozion dal ûs de lenghe furlane intal mont dal sport.