21/03/10

Aghe e dirits: une bataie cence confins


Ai 22 di Març e cole la Zornade internazionâl de aghe. Pe ocasion us proponìn la traduzion par furlan, curade di Licio De Clara (Serling), de letare pastorâl dal vescul Luis Infanti Della Mora che al partìs propit dal teme de aghe par svilupâ une riflession impuartante su lis responsabilitâts di ogni persone inte lote pe dignitât dal om e pe difese de nature.
Il vescul, che al è di divignince furlane, al fevele prin di dut de situazion che al à sot dai voi intal so teritori, o sei la part de Patagonie che e je in Cile, ma i temis che al fronte no àn confins e a son impuartants ancje par nô che o vivìn ta cheste bande dal mont: il valôr de aghe; il rapuart dal om cu la tiere e cu lis risorsis naturâls; i pericui che cierts sistemis economics a àn su chest ecuilibri; il svilup di modei che no fischin il teritori; la solidarietât cun chei altris popui.
Il Comitât 482 al è impegnât sul front dai dirits linguistics, parcè alore tocjâ chescj temis? Prin di dut parcè che no vivìn fûr dal mont cemût che cualchidun al volarès fâ intindi: il nestri impegn al è dentri de societât furlane e la nestre lote e je peade a chês altris bataiis pai dirits, come che o vin ricuardât plui voltis ancje par mieç de ZFD. E po parcè che ta chest cuadri di rispiet pal ambient e pal om a àn un puest di prin plan ancje lis lenghis. Cun di fat, fevelâ di difese dal ambient e dal teritori e lassâ fûr lis lenghis che ta chel teritori a son nassudis e si son svilupadis e sarès dome ipocrisie.

1 commento:

Unknown ha detto...

Al esist ancje un'âltre maniêre di gjestî le âghe che in Belgjiche a funzione benissim da agnorums:Dâle de gjestî ai comuns interssâts. Le societât di gjestion a devente cussí une multicomunâl o so volês une intercomunâl. A mi somee che al sarès plui costrutîf di proponi gnovis ideis, massime se chestis a son bielzà ativis e puartin sodisfazions a di ducj. No ai nuie cuintri i plevans, massime se furlans, ma chiste manie di tirâ drenti tai discors simpri un plevan o un prelât al mi fâs pensâ dome che cuant che le glêsie a controlave dut in Friûl a 'nd ere dome miserie e i furlans a jerin dome sotans. Se le glêsie a ten pe marilenghe tant miôr ma se a scomence a impaçâsi di dut o tornin indaûr di cent agns. So vin di recitâ une litanie ogni vôlte che a si vierç un rubinet al é miôr che le glêsie a si ocupi di religjon e di sosten spirituâi par chei che no san stâ cence.Pal rest, o vin di fâ di bessôi. Come i grancj e no come i fruts. I plevans a van i prelâts a son lâts, lassin ju indulà che a àn di stâ: In te glêsie.
Alé op, o 'nd ai dite immó une,
ma amancul o vês une reazion :-)