Cunvigne a Udin su la Cjarte europeane des lenghis

Al mancje aromai pôc par rivâ ai vincj agns de adozion de bande dal Consei de Europe de Cjarte des lenghis regjonâls o minoritariis.
Un apontament che al ufrìs il spont al Dipartiment di Siencis Juridichis e ae catedre Jean Monnet in guvier e politichis de Union Europeane de Universitât di Udin par inmaneâ une cunvigne internazionâl che e à par titul "Vincj agns di Cjarte europeane des lenghis regjonâls o minoritariis. Lenghis, dirits, citadinance: Friûl-Vignesie Julie, Italie, Europe, Mediterani" e che si davuelzarà a Udin joibe ai 6 (Sale Gusmani, li de sede de Universitât di Palaç Antonini) e vinars ai 7 di Jugn (Sale Pasolini dal Palaç de Regjon in vie Sabbadini).
Si trate di une ocasion impuartante par fâ il pont su la situazion des politichis di tutele e di promozion des lenghis minorizadis intal stât talian e in Europe. Tra i ospits ancje il Comitât 482.
Par ducj i detai su la iniziative baste dâ un cuc achì.

Candidâts retôrs, Pascolo al sosten il document dal Comitât 482

Ai 8 di Mai si varàil prin turni eletorâl par sielzi il gnûf retôr de Universitât di Udin. Trê i candidâts che si son fats indenant: Alberto Felice De Toni, za preside de facoltât di inzegnarie; Paolo Pascolo, professôr di bioinzegnarie; e Leonardo Sechi, proretôr e professôr di medisine interne.

Pe sô funzion centrâl inte formazion, ma massime pal fat di jessi nassude de mobilitazion dal popul furlan, la Universitât di Udin e varès di jessi un dai cûrs e dai cjâfs de politiche linguistiche pal furlan, ma ancje pal sloven e pal todesc che si fevelin inte nestre tiere. Magari cussì no, fale cualchi ecezion singule, fin cumò nol è stât cussì.

Al è duncje impuartant savê ce che a pensin in proposit i candidâts retôrs. Il Comitât 482, cemût che al à fat pes elezions regjonâls, al à metût adun un document cun diviersis domandis / propuestis che al è stât consegnât ai trê candidâts.

Fin cumò, l'unic candidât che al à rispuindût al è stât Paolo Pascolo e lis sôs rispuestis a van inte direzion che o volaressin che la Universitât furlane e cjapàs. Viodìn alore ce che i eletôrs de Universitât a decidaran.

Intal spazi dai coments cualchi element plui in detai.

Regjonâls 2013: lis rispuestis dai candidâts aes nestris propuestis

Par che il teme des lenghis propriis dal Friûl – Vignesie Julie nol vegni lassât fûr dal dibatiment pes elezions regjonâls dai 21 e dai 22 di Avrîl, il Comitât 482, adun cuntune vincjine di realtâts che a son espression des comunitâts di lenghe furlane, slovene e todescje (de Filologjiche ae associazion slovene Edinost, di Onde Furlane a La Patrie dal Friûl, dal setemanâl La Vita Cattolica ae Union Scritôrs Furlans, dal Novi Matajur al Istitût Tellini, dal Comitât pe Autonomie dal Friûl al Diari, e v.i.), a àn metût jù il document “Lenghis propriis, fonde di autoguvier eoportunitât di cressite par ducj” là che a son dentri un pocjis di domandis/propuestis pai candidâts in corse pe presidence de Regjon e pes listis che ju poin.

Martars ai 16 di Avrîl, a 11.15 di matine, alì di palaç Mantica a Udin, al è in program un incuintri public / conference stampe là che si darà comunicazion des rispuestis dai candidâts. Il test al è svilupât su cinc sezions e al presente in dut vincj ponts cun rispueste separade. Ta cheste maniere si vûl permeti a ogni candidât di acetâ e di impegnâsi a svilupâ lis azions proponudis ancje in maniere parziâl. Al sarà cussì plui sempliç permeti a ducj i citadins di capî lis posizions in cjamp, cence che nissun candidât al puedi dî che nol à rispuindût par vie che nol veve alternative ae acetazion in bloc dal document.

E l'articul 3 dal Statût di Autonomie?

Ai 31 di Zenâr a colin i 50 agns dal Statût di Autonomie de Regjon Friûl - Vignesie Julie. Al è in gracie di cheste autonomie che la nestre tiere e à podût fâ pas indenant une vore impuartants, pas che forsit in dì di vuê tancj a dan par scontâts cence domandâsi in ce condizions che o saressin se no vessin vût cheste autonomie e cence domandâsi in ce stâts che o finiressin se o vessin di pierdile.

Vuê forsit plui che in altris moments, ancje par vie de apatie di tancj di lôr, la nestre autonomie e je sot atac. Par difindile e par incressile però no bastin lis peraulis. Di une bande al covente savêle esercitâ no par garantî cualchi privileç, ma par ufrî un model di guvier che al permeti ai citadins e aes comunitâts che si aministre di vivi miôr (sul front dai dirits, dal ambient, dai servizis, dal lavôr e v.i.). Di chê altre bande al covente motivâle, ven a dî spiegâ il parcè de nestre specialitât. Une specialitât che no si fonde plui su lis resons che a podevin jessi 50 agns indaûr, ma che in dì di vuê si fonde dome suntun element: la presince, ancjemò maioritarie, di comunitâts che a fevelin intune lenghe divierse di chê dal stât.

Su chest secont pont però la Regjon in chescj agns e à fat pardabon pôc, par no dî che e je lade di chê altre bande... La prossime legjislature no podarà fâ di mancul di frontâ chest grop, almancul che no si vueli riscjâ di pierdi la nestre autonomie. Intai 50 agns dal Statût, duncje, il Comitât 482 adun cu la associazion slovene Edinost al à dât fûr un comunicât stampe, inviât ancje a ducj i conseîrs regjonâi, là che si riclame la atenzion su chest aspiet. Un aspiet che al è leât prin di dut al articul 3 dal Statût di Autonomie che, in buine sostance, al reste ancjemò dome su la cjarte. Il test integrâl dal comunicât lu cjatais intal spazi dai coments e sul nestri sît internet.

Cjarte europeane: a ce pont sino?

A ce pont sino cul percors di ratifiche de Cjarte europeane des lenghis regjonâls o minoritariis? Il teme al jere al ordin dal dì de riunion di joibe de V Comission de Cjamare dai deputâts, ven a dî chê che si ocupe di belanç, tesaur e programazion. In buine sostance il test nol è stât frontât, ma tornât a mandâ in III Comission par vie che intal confront tra il relatôr, o sei il parlamentâr sart Giulio Calvisi (te foto), e il sotsegretari Gianfranco Polillo (par cui che no sal visàs al è chel dai "oneri aggiuntivi"...) al è vignût fûr che, se pes lenghis minoritariis cjapadis dentri intal proviodiment i "coscj" a son cuvierts de leç statâl 482/99, pal romanì (la lenghe fevelade di rom e sinti) no si à informazions in mert ae cuvierzidure finanziarie. Il test di ratifiche al ven duncje blocât in spiete che la III Comission e fasi un aprofondiment in proposit. Fin chi la informazion; cumò cualchi riflession.

Al sarès di jessi contents, massime in timps là che tocje strenzi la cengle, par cheste atenzion mostrade dai parlamentârs talians pes spesis che a compagnin i proviodiments che a son daûr a prontâ. Pecjât che no mostrin la stesse atenzion par ducj i proviodiments e che, cuant che si trate di garantî i dirits linguistics, in Italie a vedin simpri vût il braç curt, ancje cuant che lis vacjis a jerin grassis...

Al sarès di jessi contents parcè che a voltis fâ une robe mâl al è piês che no fâle e, viodût che il test di ratifiche cumò in discussion al garantìs a furlans, sarts e a altris comunitâts minorizadis une tutele linguistiche che su cierts ponts e je fintremai plui basse di chê previodude de 482, alore al sarès forsit miôr che il proviodiment nol passàs e, chest rimant ae III Comission, al podarès lâ ta chê direzion. Pecjât però che chest al dipendi dome di un resonament sui "coscj" e no sui contignûts dal proviodiment.

Al sarès il câs alore di rindisi cont che, ancje daûr di cheste vicende, la logjiche e je la stesse che e je daûr a segnâ la politiche taliane tai confronts des comunitâts minorizadis: 1) ducj i progrès fats vie pai agns '90 e tal prins agns dal secul gnûf in teme di dirits linguistics a son metûts in discussion (par no dî sot atac) sul plan legjislatîf, juridic e de cuvierzidure economiche; 2) a paiâ il presit plui alt a son chês comunitâts che no àn tratâts internazionâi che lis tutelin o une rapresentance politiche che e sa fâsi valê jù a Rome (e no je tant une cuistion di numars, ma di convinzion). Par fevelâ juste di cjase nestre, ce credibilitât si puedie vê tal pretindi il rispiet dai dirits linguistics dai furlans jù a Rome cuant che la Regjon Autonome Friûl - Vignesie Julie no ju rispiete nancje intai cjamps di sô competence?

Riflessions sardis, ma no dome...

O vin za fevelât dai atacs puartâts dal guvier centrâl aes dôs lenghis minorizadis plui impuartantis dal stât talian, ven a dî sart e furlan. O vin za fevelât ancje dai atacs indreçâts, dispès cu la poie cuant che no cul sburt di une cierte stampe taliane, cuintri de autonomie e de specialitât di ciertis regjons tant che Sardegne e Friûl - Vignesie Julie. Lu vin fat di un pont di viste furlan. Al è però interessant fâlu ancje di un pont di viste sart. Par chest o segnalìn chest intervent publicât sul blog, simpri une vore interessant (ancje cuant che al pues sucedi di no jessi dacuardi cun lui) di Roberto Bolognesi.

E za che o vin citât chest blog, nus somee util segnalâ ancje une altre des riflessions che al propon. Si fevele di Salvatore Meloni. Cence jentrâ intal mert de sô vicende, il dât che al è just marcâ al è che ancjemò une volte si va di là de leç statâl 482/99 e fintremai dal codiç di procedure penâl, tratant il sart di dialet e dineant a Meloni di podê doprâ la sô lenghe. Ancje ta chest câs o invidìn a lei l'intervent di Bolognesi.

A son riflessions fatis di un sart, ma al bastarès cambiâ uns dôs peraulis e a podaressin jessi benon lis riflessions di un furlan.

O rapresentìn dome dai "oneri aggiuntivi"

Intant de discussion dai ordins dal dì fats indenant di un grup di parlamentârs furlans e sarts cun chê di superâ la discriminazion artificiose tra lis diviersis minorancis linguistichis che il guvier taliane al veve metût dentri intal decret leç su la revision de spese, si à palesât ancjemò plui a clâr ce che i dirits linguistics a rapresentin par cui che al è al podê intal stât talian.

Il sotsegretari Gianfranco Polillo (te foto), in rapresentance dal Guvier Monti, al à spiegât parcè che un dai ordins dal dì - chel che al impegnave l'esecutîf talian a eliminâ chê discriminazion che e fâs a pugns cu la Costituzion republicane e cu la leç statâl 482/99 - nol podeve jessi acetât. La reson e je semplice: no si à nuie in contrari dal pont di viste dal principi, ma tal moment che si va a fevelâ di bêçs nol va plui ben. I dirits linguistics no si puedin rispietâ parcè che, par chest Guvier, a rapresentin dai "oneri aggiuntivi". Furlans e sarts a van ben fintremai che a pain e a stan cuiets, ma cuant che a rivendichin la aplicazion dai dirits che lis stessis leçs dal stât ur ricognossin alore a deventin un pês o, par doprâ une peraule "tecniche", a deventin un "onere".

E je une logjiche indegne che vuê e colpìs dûr i dirits des comunitâts minorizadis, ma che za si tache a viodi ancje in altris cjamps: lavôr, scuele, salût... La crisi e devente un scût dulà platâsi daûr par dismantelâ chê rêt di dirits fate sù cun bataiis lungjis e faturosis. E je une cuistion che nus tocje ducj, di là de lenghe che o fevelìn. E se o sperìn che a saran lôr a fermâsi di bessôi o sin pardabon dal gjat!

Intal ultin comunicât stampe dal Comitât 482 si fronte plui a fonts propit chest teme. Il test, in plui che sul sît dal comitât, si lu cjate ancje chi in zonte, intal spazi dai coments.

Document sui dirits linguistics a Napolitano

Intant de visite in Friûl dal president de Republiche taliane, Giorgio Napolitano, il sindic di Faedis, Cristiano Shaurli, i à consegnât al cjâf dal stât une letare vierte sui dirits linguistics metude adun dal Comitât 482. Il test integrâl dal document o podês cjatâlu achì.

Simpri in teme di minorancis, a Vençon Napolitano al à ancje vût un incuintri cui delegâts regjonâi e provinciâi des dôs organizazions di riferiment de comunitât slovene, SKGZ e SSO.

Tant par no stracapîsi...

Dal moment che su la cuistion de "ratifiche" de Cjarte europeane des lenghis regjonâls o minoritariis de bande dal Consei dai ministris talian e je stade fate cetante confusion, miôr sclarî cualchi pont. Cun di fat il prin comunicât stampe dal Consei di ministris, che cumò al è stât mendât, al fevelave di "ratifiche" de Cjarte e tancj di lôr lu àn cjapât par bon di plante fûr e, di chê strade, si à let intervents trionfalistics e fintremai articui di stampe che a disevin che di cumò indenant lis minorancis linguistichis a podaran gjoldi di dirits linguistics che, in realtât, a jerin bielzà garantîts cu la leç statâl 482/99! Su la atenzion e la precision che cierte stampe e à par chestis tematichis o vin za vût ocasion di fevelâ e nol è il câs di tornâi parsore... Par no stracapîsi, duncje, viodìn di lâ par ordin.

1) Il Consei dai ministris al à fat bon il disen di leç su la ratifiche de Cjarte. Chest al vûl dî che il test al varà cumò di passâ l'esam des dôs ramis dal Parlament e po jessi firmât dal president de Republiche taliane. Dome in chê volte la ratifiche e deventarà reâl.

2) Viodût che si trate di un disen di leç, no si à nissune sigurece sui timps che a coventaran par rivâ insom cul percors de ratifiche. Duncje al è stât fat un pas indenant che nus svicine ae ratifiche, ma no savìn cuant che chest obietîf al sarà otignût.

3) Il disen di leç no si à ancjemò rivât a viodilu e, duncje, no si sa cuâi che a sedin i nivei de ratifiche proponude. Cun di fat, il percors al permet ancje di ratificâ la Cjarte in maniere parziâl, o sei garantint dome il rispiet di cierts ponts de Cjarte e no di ducj. Viodût che il comunicât dal Guvier Monti al citave in maniere esplicite tant che riferiment di base pal test de ratifiche la leç statâl 482/99, al ven di pensâ che a saran garantîts almancul i nivei di tutele za previodûts de leç. Cence viodi il test però al è pussibil di dî. Al è duncje impuartant che i parlamentârs che si cjataran a esaminâ il disen di leç - almancul chei che a rivin di chenti o di altris areis interessadis de cuistion - si impegnin par che no si ledi sot di cierts nivei di tutele.

4) Ancje cuant che si rivarà ae ratifiche, si varà un strument di pression in plui par difindi i nestris dirits linguistics, ma si à di tignî a ments che i proviodiments pratics di podê meti in vore a nivel statâl a restin chei previodûts de 482/99. La stesse leç che il guvier Monti cu la ultime finanziarie al à depotenziât di brut cul gjavâi buine part des risorsis finanziariis. Su chest ultin pont, o lin a dilunc a viodi il cidin cuasi totâl di mieçs di comunicazion, politics e associazions di cjase nestre. Nol è un biel segnâl...

Pas indenant pe ratifiche de Cjarte europeane pes lenghis

Intant de riunion dal Consei dai ministris di îr, tra la istituzion de fieste pal inovâl de "unitât de Italie", l'aument dai podês dal esecutîf e un percors facilitât pal cumierç di armis, il guvier Monti al à dât il vie libare pe ratifiche de Cjarte europeane pes lenghis regjonâls o minoritariis (1992). Si trate di un dai documents di fonde pal rispiet dai dirits linguistics des comunitâts minorizadis che il stât talian al veve firmât agns indaûr, ma nol veve po ratificât. Là che, la mancjance de ratifiche, e impedive di meti in vore i principis de Cjarte intal stât talian. Tant par fâ un esempli, la mancjance de ratifiche e jere stade doprade (in maniere dal dut strumentâl e cence fondis) par motivâ il fat che la RAI no meteve in vore la leç statâl 482/99 che e garantìs spazis pes lenghis minoritariis ricognossudis dentri dal servizi radiotelevisîf public. A son coventâts cetancj agns, ma cumò o sin plui dongje de ratifiche de Cjarte: jacume! Il "plui dongje" al dipent dal fat che, come che al sucêt pai decrets leçs dâts fûr dal guvier, pe aprovazion definitive al covente il vôt dal Parlament. Par solit par completâ chest passaç no son problemis e, duncje, il pas principâl al varès di jessi stât fat, ancje se in Italie no si sa mai....

Magari cussì no, cheste gnove positive e rive distès a lassânus la bocje garbe. Cun di fat, cemût si podaraial rispietâ i principis e i contignûts de Cjarte cuant che il strument principâl par fâlu, ven a dî - daûr des stessis peraulis jessudis îr de bocje dai rapresentants dal guvier talian - la leç statâl 482/99, al è aromai cuasi cence risorsis propit par vie dai tais decidûts dal guvier Monti? Chel istès, par cjalâ chê altre muse de medaie, o podìn dî che cu la ratifiche de Cjarte o varìn une arme in plui pe nestre lote e, pôc ma sigûr, no mancjarìn di doprâle.

Rispiet des minorancis nazionâls: pe Europe, la Italie e à inmò tant ce fâ

L'an passât il Comitât consultîf dal Consei de Europe su la Convenzion cuadri pe protezion des minorancis nazionâls al jere vignût intal stât talian par cjatâsi cu lis autoritâts e cui rapresentants des minorancis e meti jù il so rapuart sul rispiet des misuris di tutele previodudis de Convenzion. Di chei incuintris e je vignude fûr la "Tierce Opinion su la Italie", un document che al fâs il pont sui aspiets positîfs e negatîfs de azion di tutele des minorancis nazionâls che a vivin intal stât talian e, tra di lôr, ancje furlans, slovens e todescs.

Nol covente dî che - cundut dal lengaç diplomatic doprât des autoritâts europeanis - il cuadri che al ven fûr al è avonde negatîf. Ancje chei pas indenant fats sul front de legjislazion si son sfantâts par vie de mancjade aplicazion di chestis leçs o ben par vie dai tais finanziaris pesants fats sei a nivel statâl che regjonâl. Un dai aspiets che a preocupin di plui in Europe al è l'aument de intolerance e dal razisim: une plaie che e colpìs massime rom e sinti, ma che no à sparagnât nancje slovens e furlans.

Il guvier talian, ma ancje la aministrazion regjonâl dal Friûl - VJ, si ricjatin cun gnovis critichis pe lôr maniere di compuartâsi cu lis minorancis e cun racomandazions par cambiâ direzion. La mancjance di coments de bande des autoritâts talianis e locâls e mostre a clâr che no si à masse voie di cambiâ ande. Chel istès al è impuartant che i citadins a sedin informâts. Par chest il Comitât 482 al à dât fûr un comunicât stampe là che si fâs un cuadri sintetic dai contignûts dal rapuart european, massime pe situazion che e rivuarde il Friûl - VJ e, duncje, furlans, slovens e todescs.

Il test integrâl dal comunicât lu cjatais achì, ma ancje tal spazi dal coments.

Un libri cuintri dai lûcs comuns su la lenghe furlane

Si visaiso dal decalic sui lûcs comuns su la lenghe furlane che cualchi an indaûr il Comitât 482 al veve fat zirâ? Po ben, chê iniziative e à ufiert la ispirazion par un lavôr che al va a frontâ (e a sdrumâ) propit chei a altris lûcs comuns su la lenghe furlane e su altris lenghis che a patissin la stesse condizion di minorizazion.

O fevelìn dal libri "Cjalant il Friûl / Sguardi sul Friuli" curât di Priscilla De Agostini e Silvana Schiavi Fachin e publicât de cjase editore Forum là che cuindis personis che par storie personâl o professionâl a son leadis al Friûl (di Tullio De Mauro a Leonardo Zannier, di Xavier Lamuela a Sergio Salvi, di Pierluigi Cappello a Domenico Lenarduzzi) a resonin su chescj temis e a sdrumin jù cetancj dai lûcs comuns che inmò a zirin su la nestre lenghe e su lis azions di politiche linguistiche metudis in at par promovile.

Un lavôr, duncje, che al merete let e che al pues jessi un moment impuartant di riflession pal Friûl e no dome. La presentazion dal libri e je in program chest vinars, prin di Lui, a siet sot sere (19.00) inte cort di Palaç Morpurgo (se al plûf in sale Ajace).

Intant de presentazion si varà un confront sui temis frontâts dal libri. Moderâts di Pauli Cantarut, a intervignaran Furio Honsell, Lorenzo Fabbro, Valter Colle, Carli Pup e lis dôs curadoris. La presentazion e sarà compagnade ancje tescj lets di Andrea Collavino e Serena Di Blasio.

Fevelâ par furlan in Consei comunâl: un dirit o une strade di rive sù?

Intai Comuns che si cjatin intal teritori là che e vîf une comunitât minorizade ricognossude, i membris dai Conseis comunâi (ma il stes al vâl par chei des Comunitâts di mont, des Provinciis e des Regjons) a àn il dirit di doprâ intant de lôr ativitât la lenghe de lôr comunitât. A dîlu al è l'articul 7 de leç statâl 482/99.

Il principi al è un vore clâr, ma la sô aplicazion e à cjatât no pôcs pidiments. Il câs che i à capitât a Bruno Colledani, conseîr comunâl di Spilimberc, al è avonde significatîf. Tal prin coment o cjatais ce che nus à scrit e che nus somee impuartant che ancje voaltris o vedis ocasion di lei.

Une Resistence che e va indenant

Ai 25 di Avrîl e cole la fieste de Liberazion dal nazifassisim. Un inovâl che al ricuarde il sacrifici di tancj di lôr che a àn lotât par concuistâ la libertât e par fâ sù un mont plui just. A passe sessante agns di chei fats, cul smamîsi de lôr memorie direte, si tint a dâ par scontade la libertât che e je rivade di chê lote popolâr. La libertât, invezit, no je mai scontade e si à simpri di impegnâsi par tignîle vive.

La vitorie sul nazifassisim, dut câs, no à puartât la fin des bataiis pe libertât, pe democrazie, pai dirits. Chestis lotis a àn viodût dispès in prime linie propit chei che a vevin fat la Resistence. Chest al vâl ancje pes bataiis pai dirits linguistics, pes nazionalitâts tibiadis, pal autoguvier. Nol è un câs che, juste par fâ un esempli, un dai prins parlamentârs a sburtâ par une leç pal furlan e par chês altris lenghis minorizadis al fos Mario Lizzero “Andrea” (te foto), un dai oms di ponte de Resistence furlane.

Magari cussì no, su chest front al reste ancjemò tant ce fâ. Lis nazionalitâts e lis lenghis minorizadis, dut câs, a cognossin ben il significât de peraule Resistence, dal moment che masse dispès e je stade la uniche forme di esistence che ur è stade permetude se no volevin jessi scanceladis o vualivadis. Par chest, vuê come îr, in Friûl come inaltrò, la Resistence e va indenant.

Letare vierte a Tondo e Molinaro

Il Comitât 482 al à scrit une letare vierte al president de regjon Tondo e al assessôr regjonâl pe culture Molinaro sui ritarts inte politiche di tutele des minorancis linguistichis inte regjon Friûl - Vignesie Julie. Lei la letare achì.

Mobilitazion pai dirits dal Friûl

Lunis ai 22 di Març e je stade presentade, intant di une conference stampe che si è tignude a Udin, une propueste ae Comission Paritetiche Stât / Regjon par prontâ des normis di atuazion dal Statût di autonomie regjonâl che a garantissin formis di tutele plui largje pe lenghe furlane. La iniziative e je stade inmaneade dal Comitât pe autonomie e pal rilanç dal Friûl cu la colaborazion di altris sogjets. Ancje il Comitât 482 al à dât il so contribût e achì o podês cjatâ la riflession che o vin fat par cheste ocasion.

La Italie come la Cine?

O leìn sul sît de agjenzie reuters che lis lenghis des 56 minorancis linguistichis ricognossudis de Cine a son in pericul di estinzion par vie de politiche di assimilazion metude in vore dal regjim di Pechin. In particolâr la imposizion di bande dal Stât cinês dal mandarin tant che uniche lenghe di podê doprâ inte scuele e je une des resons plui fuartis di preocupazion pe lôr sorevivence. Par dî la veretât, se o cjalìn al spazi che i ven lassât al furlan a scuele (e no dome li), no nus somee che il Stât talian si compuarti cetant miôr dal regjim cinês cu lis sôs minorancis linguistichis.

27 di Fevrâr: Zornade Furlane dai Dirits

"Al è zaromai di un pôcs di agns che, ai 27 di Fevrâr, il Comitât 482 al celebre la Zornade Furlane dai Dirits. Chê date, di fat, e ricuarde la Joibe Grasse dal 1511 cuant che si impià il riviel popolâr plui grant inte storie dal Friûl: un episodi storic che, fûr di ciertis leturis stereotipadis che cualchidun al va dilunc a proponi, al mostre a clâr che lis comunitâts furlanis a jerin prontis a doprâ ogni mieç par difindi i lôr dirits."

Al tache cussì il messaç dât fûr dal Comitât 482 pe Zornade Furlane dai Dirits. La version integrâl dal test le cjatais intal spazi dai coments o ben sul sît dal Comitât.
Buine Zornade Furlane dai Dirits a ducj!

Doman la ZFD su Onde Furlane

Zaromai di un pôcs di agns, Radio Onde Furlane, cu la poie dal Comitât 482, e celebre la Zornade Furlane dai Dirits cuntune programazion speciâl che e à chê di stiçâ la riflession sui dirits dai furlans e su lis bataiis inviadis par difindiju. Un apontament che, ta chest 2010, si cubie cui 30 agns de emitente par puartâ ancje altris elements di novitât inte programazion. Doman, sabide ai 27 di Fevrâr, lis trasmissions dedicadis ae ZFD a tacaran tor nûf mancul un cuart di buinore (8.45) e a laran indenant par dut il dì. Intai coments o publichìn il comunicât stampe dât fûr de emitente furlane pe ocasion.

Cunvigne in Senât pai 10 agns de 482

'Le minoranze linguistiche in Italia dalla legge 482 del 1999' al è il titul de cunvigne promovude dal Senât de Republiche taliane in ocasion dai 10 agns de leç 482. Lunis ai 22 di Fevrâr a'nt fevelaran il president de comission dirits umans di Palaç Madama, Pietro Marcenaro, l'innomenât linguist Tullio De Mauro e il diretôr dal servizi des prerogativis, des imunitâts parlamentârs e dal contenziôs dal Senât, Luigi Ciaurro. Viodût che la leç 482, dopo 10 agns de sô aprovazion, e je in buine sostance ancjemò no aplicade sperìn che cheste cunvigne e sedi une ocasion par un bon esam di cussience di bande de classe politiche taliane.