28/06/14

In Regjon e covente une rivoluzion culturâl pe lenghe furlane

Al è zaromai passât un an di cuant che la gnove Zonte regjonâl e à tacât a lavorâ e il Comitât 482, adun cu lis realtâts associativis che a son in prime linie intal promovi la lenghe furlane (Comitât pe Autonomie e pal Rilanç dal Friûl, Societât Filologjiche Furlane, Radio Onde Furlane - Informazion Furlane, La Patrie dal Friûl, Il Diari, Union Scritôrs Furlans, Glesie Furlane, Istitût Achille Tellini, KappaVu, Colonos, Ladins dal Friûl, Serling, CLAAP), a àn metût jù un document che al fâs il pont su lis politichis pe lenghe furlane metudis in vore dal esecutîf regjonâl fin cumò.  

03/04/14

3 di Avrîl: fieste de Patrie dal Friûl


"Lis primis celebrazions dal 3 di Avrîl lis à tacadis pre Checo tai prins agns Setante. No vin mai vude grande fole, ma si leve jù a Aquilee contents come paschis a celebrâ, a ricuardâ, a ringraziâ, a domandâ. A domandâ di cjapâ in man almancul par une volte il nestri distin, di tornâ a cjerçâ tune maniere gnove e nestre la libertât vude e pierdude secui indaûr. Une libertât regalade e je simpri a riscjo. Une libertât no sudade si le piert cence inacuarzisi. Soredut al è facil confondi la libertât cu la mancjance di sclavitût. Cuant che un popul nol comande te sô tiere nol è libar, cuant che un popul nol pues studiâ te sô lenghe nol è libar, cuant che un popul no pues decidi dal so distin nol è libar, cuant che un popul sotan no si inecuarç di jessi sotan parcè che lu an incjocât o indurmidît o scanât, nol è libar...
(Antoni Beline)

26/02/14

Une Joibe Grasse di no dismenteâ

Ai 27 di Fevrâr dal 1511 - si jere la dì de Joibe Grasse - si inviave la faliscje de plui grande rivolte popolâr de storie dal Friûl. Une rivolte che, massime intes campagnis, si moveve intal non des “leçs antighis”, o sei dal rispiet des usancis e dai dirits di autoguvier rivendicâts des comunitâts furlanis. Ai 27 di Fevrâr dal 2014 - ancjemò une volte Joibe Grasse - si celebre la Zornade Furlane dai Dirits. Une iniziative lançade dal Comitât 482 intal 2004 cun chê di mantignî alte la atenzion sui dirits linguistics e nazionâi des comunitâts dal Friûl. Une iniziative che, a planc a planc, e je daûr a slargjâsi e à cjatâ gnovis adesions. O segnalìn, par esempli, la programazion speciâl che Radio Onde Furlane e va dilunc a svilupâ zaromai di agns ta cheste zornade e che achì o podês cjatâ il program di chest an; ma ancje la iniziative inmaneade da La Patrie dal Friûl pai 27 di Fevrâr a Osôf. Ancje chest an il Comitât 482 al à dât fûr pe ocasion un comunicât che o cjatais achì. Pal rest: buine Zornade Furlane dai Dirits! La lote e va indenant!