08/07/08

A Pordenon une ocasion pierdude

Come che si pues lei ancje sul sît di Radio Onde Furlane, il Consei comunâl di Pordenon al à fate buine îr di sere la delibare là che si domande di jessi gjavâts fûr de aree là che si metarà in vore la gnove leç regjonâl su la lenghe furlane. Ancje se cun cualchi oposizion in plui di chel che al someave ae vilie dal vôt, la aministrazion comunâl pordenonese vuidade di Sergio Bolzonello e à duncje fat il prin pas par no vê di meti in vore la leç regjonâl.
Daûr di cheste decision, al spieghe Bolzonello, a son massime dôs resons: prin di dut che il Comun al jere stât cjapât dentri te zone furlanofone fissade ancjemò cu la leç 15/96 cence di une delibare de Zonte o di un vôt dal Consei comunâl; e po che la gnove leç e previôt, daûr de 482/99, che lis aministrazions locâls a garantissin une schirie di servizis linguistics pai lôr citadins judicâts dai aministradôrs pordenonês une imposizion inutile (par vie che a Pordenon i citadins no fevelaressin furlan) e costose.
Par chel che nus rivuarde, i problemis principâi leâts a cheste decision a son doi. Di une bande, il fat che Pordenon, come cjâf lûc di Provincie, al dinee cussì ogni visibilitât ae lenghe fevelade inte plui part dal Friûl ocidentâl. Di chê altre che, intai fats, al à chê di lassâ fûr la lenghe furlane ancje di un servizi fondamentâl come chel des scuelis che in citât a son frecuentadis ancje di cetancj fruts e students che a rivin de aree furlanofone de Provincie. Su chescj doi ponts, lis rispuestis dadis dal sindic Bolzonello nus somein un tic debulutis.
Contrari di ce che al pense cualchidun, nô o vin simpri crodût che tal meti in vore lis leçs a coventin gradualitât e bon sens. Cun chescj doi elements, si varès podût meti in vore la gnove leç sul furlan ancje a Pordenon, cence imponi nuie a di nissun, ma ufrint pussibilitâts gnovis a cui che lis domandave. Magari cussì no, no si à sielzût cheste strade. Pecjât… une altre ocasion pierdude.

05/07/08

Doi pês dôs misuris ...

I parlamentârs Maran e Rosato (PD) a àn presentât une interogazion al ministri talian pal forest Frattini su la situazion de minorance taliane in Cravuazie. In particolâr Maran e Rosato a lamentin l'ostruzionisim des autoritâts cravuatis cuintri de istituzion di une scuele pe infanzie in lenghe taliane inte citât di Zara. Clâr che il Comitât 482 al è a pro dai dirits di dutis lis minorancis e duncje ancje dai dirits de minorance taliane in Cravuazie (sù par jù 19.000 locutôrs, ven a stâi il 0,44 % de popolazion cravuate), dut câs no rivìn propit a capî parcè che ce che al è un dirit pai talianofons in Cravuazie al devente un "delit" pai furlans in Friûl. Ducj si visìn ancjemò lis declarazions rabiosis cuintri dai dirits linguistics dai furlans fatis dal parlamentâr Maran (viôt in chest blog). Cheste miopie di bande di ciertis personis e a un non sôl : discriminazion!

Tal prin coment ancjemò detais su la notizie.

04/07/08

E vie Pordenon...

La aministrazion comunâl di Pordenon e à chê di gjavâsi fûr de zone là che si metarà in vore la gnove leç regjonâl su la lenghe furlane. Le propueste e varès di jessi votade za lunis che al ven.
Dal sigûr il furlan al è za di un biel pieç che nol ven fevelât in citât tant che lenghe native, ma al ven doprât di chei che a son vignûts a stâ o a lavorâ in citât de aree furlanofone dal Friûl ocidentâl. E no 'nd è pôcs. Come che a 'nd è ancje di citadins imigrâts che a varessin gust che i lôr fîs a imparassin la lenghe furlane e che lu àn testemoneât tal moment de iscrizion a scuele. Pal Comun di Pordenon, duncje, chescj citadins no valin come chei altris.
Dut câs, forsit, la robe piês al è che Pordenon nol è dome Comun, ma ancje cjâf lûc di Provincie, une Provincie là che la lenghe furlane e je ancjemò ben vive. Se Pordenon al vûl gjavâsi de zone là che si met in vore le leç sul furlan che lu fasi, ma che nol pretindi di rapresentâ dut il Friûl ocidentâl!
Cuâi i coments ae volontât de aministrazion comunâl pordenonese? Tal prin coment o cjatais chel dal vicepresident de Societât Filologjiche Furlane pal Friûl ocidentâl.

02/07/08

Incuintri di Glesie Furlane

Glesie Furlane e invide ducj ae messe grande intal avôt dai Sants Ermacore e Furtunât ai 13 di Lui aes 7 sore sere inte basiliche di Aquilee.

01/07/08

Incuintri dal comitât pe autonomie pal rilanç dal Friûl cul president Tondo

Il Comitât pe autonomie e pal rilanç dal Friûl ai 25 di Jugn dal 2008 al à vût un incuntri cul president de Regjon Tondo (te foto, un moment de riunion) e, cualchi dì prime, cul assessôr regjonâl pe culture Molinaro. Tra lis diviersis tematichis frontadis ancje chel de lenghe furlane e in particolâr de gnove leç di tutele. Tondo e Molinaro a àn declarât la lôr disponibilitât a difindi la leç denant de Cort Costituzionâl. Un segnâl positîf di bande di une Zonte che fin cumò a 'nd à dâts cetancj di negatîfs. Sperìn che cheste e sedi une buine ocasion par vierzi un vêr dialic su la tematiche dai dirits linguistics cu la gnove aministrazion regjonâl. Chi o cjatais une rassegne stampe sul incuintri.