22/06/10

Il furlan i plâs ai zovins

A proposit di zovins e lenghe furlane o segnalìn chest toc di Marco Stolfo publicât lunis ai 21 di Jugn sul cuotidian E Polis Friuli e che si pues leilu intal prin coment.
Publicât di
Etichetis:

1 commento:

Comitât 482 ha detto...

Ai zovins ur plâs la lenghe furlane. Al è ce che al ven fûr di un scandai fat pôc timp indaûr suntun campion di arlêfs dal Istitût “Malignani”. Daûr dai risultâts dal cuestionari sometût a 244 di lôr, in 12 classis fra tiercis, cuartis e cuintis superiôrs, la plui part dai intervistâts e pant un ategjament positîf viers de lenghe e dal so ûs inte vite di ogni dì. La ricercje presentade la setemane passade e ufrìs diviers elements interessants: braure e no vergogne di fevelâ par furlan, volontât di doprâ di plui la lenghe a scuele, voie di vê plui furlan di lei, di viodi, di scoltâ. I dâts tirâts dongje no son une sorprese. Doi agns indaûr la Regjon e veve promovût un scandai par valutâ l'impat des azions di tutele des minorancis linguistichis e suntun campion di 3000 di lôr la maiorance (in dut sù par jù il 70%) e jere “avonde” o “une vore” a pro dal ûs public des lenghis minoritariis e dal lôr insegnament tes scuelis. Al vûl dî che il lavôr fat di bande di istituzions publichis e di sogjets privâts nol è di bant e al rispuint a dibisugnis reâls. Propit li dal “Malignani” si à fate didatiche sperimentâl par furlan e, compagn che in altris scuelis dal Friûl, in gracie di progjets finanziâts de ARLeF - tant che “Fâs fûr l'an”, plui centrât su la leterature, e “Radio Dîs”, incuintri dal vîf e program su Onde Furlane a 360 grâts - i arlêfs a àn podût scuvierzi e preseâ cemût che la lenghe e ven doprade tai media, te musiche, te art. Une vivarositât culturâl di cerçâ ancje inaltrò: par esempli ai 23 di Jugn li de aree verde di Vie Chiesa a Culugne aes 9 sot sere.


Marco Stolfo

22/06/10, 08:03

Posta un commento

Iscriviti a: Commenti sul post (Atom)