Ancje chest an, ai 27 di Fevrâr, al torne l'apontament cu la Zornade Furlane dai Dirits, la iniziative inviade dal Comitât 482 ancjemò uns vot agns indaûr. La Zornade di chest an, dut câs, e cjape inmò plui significât dal moment che e ven a colâ intal inovâl dai 500 agns juscj dal riviel popolâr de Joibe Grasse.Come par solit, in ocasion di chest apontament, il Comitât 482 al da fûr un comunicât che o podês lei par intîr intal spazi dal coments. E je deventade aromai tradizionâl ancje la programazion speciâl che Radio Onde Furlane e met adun pe ZFD e che il so program si pues lei sul sît internet de emitente radiofoniche furlane. Chest an par altri, cheste iniziative e cjape un significât inmò plui rivendicatîf viodude la situazion di dificoltât che e cjape dentri Onde Furlane par vie dal azerament dai fonts pai programs radiotelevisîfs in lenghe furlane decidût de aministrazion regjonâl pal secont an di file.
Leadis ai 500 agns dal riviel a son po cetantis iniziativis ator pal Friûl, cualchidune le cjatais sul sît de Associazion 1511 che si è dade adun propit par fâ cognossi miôr ai furlans chest toc de lôr storie.
Alcìn la bandiere dal Friûl par rivendicâ i nestris dirits, e buine Zornade Furlane dai Dirits a dutis e a ducj!
2 commenti:
27 di Fevrâr: Zornade Furlane dai Dirits
Juste 500 agns indaûr il Friûl al è stât scjassât dal plui grant riviel popolâr de sô storie: si jere ai 27 di Fevrâr dal 1511. O fevelìn di un acjadiment che, se si lu cjale cence prejudizis, al mostre che lis comunitâts furlanis a vevin cussience dai lôr dirits e che par lôr a jerin prontis a lotâ cun ducj i mieçs. Al è par chest che, ancjemò vot agns indaûr, il Comitât 482 al à decidût di sielzi cheste date par celebrâ la Zornade Furlane dai Dirits e, an dopo an, o viodìn cun plasê che a son simpri di plui chei che le fasin lôr.
Il Comitât 482 si bat pai dirits linguistics e nazionâi des comunitâts che a formin il Friûl e, ta cheste Zornade, a son propit chescj i dirits che o rivendichìn par prins. O savìn però che ducj i dirits a son leâts ad in dopli tra di lôr e che il dinei o la limitazion di un di lôr al vierç la puarte pal dinei o pe limitazion di chei altris. Magari cussì no, chel che o sin daûr a vivi al è un moment là che ducj i dirits a son sot atac, cualchidun a muse vierte e cualchidun sot vie.
Par chest o crodìn che al sedi just impegnâsi par difindi il dirit a lavorâ in maniere dignitose, cence riscjâ la vite e cence jessi obleâts al precariât a vite; il dirit a di une scuele moderne, che e ponti su la cualitât e che e rispieti dutis lis diferencis, ancje chês linguistichis; il dirit a vê un sisteme sanitari che al cjali aes dibisugnis de int e no aes logjichis dal marcjât; il dirit a vivi intun teritori che al sedi une risorse pe coletivitât e no un afâr par pôcs di lôr; il dirit a podê doprâ ad in plen lis nestris lenghis in ducj i setôrs de societât. Dut chest, par nô, al vûl dî impegnâsi ognidun cu lis sôs capacitâts e lis sôs competencis par difindi il nestri dirit, come popul, di decidi dal nestri avignî. Cence dismenteâsi però che chest nol vûl dî lassâ fûr ducj chei altris, ma al contrari creâ spazis gnûfs di libertât ancje par cui che al ven di inaltrò.
Cundut dai atacs cuintri di cui che al è impegnât inte lote pai dirits linguistics e dai berdeis che ancjemò a impedissin di meti in vore ad in plen lis leçs di tutele – baste pensâ che dopo 3 agns che e je stade fate buine, la gnove leç sul furlan e je ancjemò ferme parcè che la aministrazion regjonâl no à mot un dêt par fâ i regolaments che a coventaressin par metile in vore – intai ultins agns o viodìn che la cussience linguistiche dai furlans e je daûr a cressi. A cressi, e in maniere inmò plui marcade, e je ancje la capacitât di mobilitazion de int cuintri di chês oparis che, ancje se a vegnin vendudis par azions strategjichis, a van dome a imponi gnovis servitûts al teritori e ae coletivitât pal interès di pôcs di lôr: l’ultin esempli e je la manifestazion di Tumieç dai 15 di Zenâr. E nol è un câs che, ta chê manifestazion, no svintulassin lis bandieris dai partîts talians, ma chês dal Friûl.
E al è propit chê bandiere che o invidìn a meti fûr ai 27 di Fevrâr di chest an, pe Zornade Furlane dai Dirits e pai 500 agns dal riviel de Joibe Grasse. Par no dismenteâ che i furlans a àn savût lotâ pai lôr dirits e che, cence falcets ma cu lis armis de democrazie, a son inmò in stât di fâlu. Par che cheste pagjine de nestre storie e deventi memorie vive e condividude.
Alcìn alore la bandiere dai dirits e dal autoguvier, par un Friûl che al puedi deventâ pardabon patrie di dirits par dutis e par ducj.
Compliments! Comunicât stampe une vore biel!
Posta un commento